Aduna karoy bag-ong gubat diha sa Mactan human niadtong nabaniog na sa tibuok kalibotan nga Battle of Mactan. Apan ang bag-ong gubat sa Mactan lahi sa kaniadtong Battle of Mactan. Ang kaniadtong Battle of Mactan naghulagway kini ni LapuLapu ug sa mga Oponganon nga supak sa foreign domination ug nanalipod sa iyang gingsakpan gikan sa peligro nga gidala sa mga katsila nga gipangulohan ni Magellan. Ang kaniadtong Battle of Mactan naghulagway usab ni LapuLapu nga usa ka maayong pangulo ug maisog nga nakigharong sa mga langyaw nga gustong maghari ug modominar sa isla nga iyang gipangulohan.
Apan ang bag-ong gubat sa Mactan dili kini mahitungod sa foreign domination kun dili mahitungod kini sa pagka-arogante sa lider niini nga si Mayor Boy Radaza. Ang bag-ong Battle of Mactan mahitungod kini sa bangi sa mga lider ug mga magpapatigayon diha sa nahisgutang dakbayan. Ang bag-ong gubat sa Mactan naghulagway kini ni Mayor Boy Radaza nga dili maayong pangulo ug wa manalipod sa iyang katawhan gikan sa hulga sa corruption diha sa iyang pangatungdanan. Ang bag-ong gubat sa Mactan naghulagway kini ni Mayor Boy Radaza nga maginokdanon, abusado sa gahom ug tangga sa iyang pagpadagan sa renda sa pangagamhanan diha sa dakbayan sa LapuLapu.
Ang bag-ong Battle of Mactan dili kini madaog pinaagi sa sundang ug mga sapang kun dili madaog kini pinaagi sa influencia ug padrino nga gisaligan sa nagkabangga nga grupo.
* * *
Makig-estorya na sa mga negosyante nga iyang gigukod ang pamonoan ni Mayor Boy Radaza aron masulbad na ang panagbangga sa duha.
Maayo kay natauhan na ang liderato sa mayor. Angayan nga huna-hunaon sa mayor ug mga dumadapig niini nga ang ilang gihimong pagpanggukod ngadto sa mga negosyante nga mipasaka kanila og kasong Graft ug Corruption didto sa buhatan sa Ombudsman dili makahatag og maayong impresyon ngadto sa mga magpapatigayon lokal o langyaw nga gustong mobubo og puhonan diha sa dakbayan sa LapuLapu. Angayan usab nga huna-hunaon sa mayor nga ang mga magpapatigayon kaabag ug katambayayong sa pagpalambo sa ekonomiya ug kinabuhi sa mga Oponganon. Angayang hinoktokan sa mayor ug sa iyang mga alipores kun unsay mahitabo sa LapuLapu kun mamakwit na ang mga magpapatigayon kay wa na makasabot ug gikapoyan na kini sa iyang pagkamaginokdanon ngadto kanila. Angayang hinoktokan sa mayor ang iyang gihimo ngadto sa mga magpapatigayon kay sa panahon nga makahukom ni sila sa pagpanglayas dako kini og ibiling kadaot ngadto sa siyudad ug sa mayor mismo. Ang ako lang mayor ba basin unya og wa na kay ikapohonan sa buwang?