EDITORYAL – Daghang mangamatay

Matag engkuwentro sa atong mga sundawo ug mga sakop sa Abu Sayyaf, daghan ang mangatipi sa duha ka habin. Mapatyan og daghan ang atong militar.

Suma pa sa usa ka taho, naay mga higayon nga anaa sa kuyaw nga “defensive position” ang mga sundawo sa gobyerno tungod sa makalilisang nga mga tirada sa mga terorista.

Daghang mga tigpaniid ang natinga niini. Ang sundawo sa kagamhanan kompleto sa kahimanang panggubat. Dili lang kay pusil kundili usab mga kanyon (howitzers) ug tinabangan pa gyud sa ayroplano labi na helicopters.

Apan matud pa sad sa uban, lisud awayon ang Abu Sayyaf sa ilang teritoryo diin suheto sila sa maong lugar samtang ang mga sundawo morag mga “estranghero” sa maong dapit.

“Busa,” matud pa sa usa ka retiradong Koronel sa Army, “makuting intelligence work ang gikinahanglan sa atong mga sundawo.”

Mao ba?