EDITORYAL – Wa na gyuy katapusan?

Ning miaging pipila ka adlaw nagsunodsunod nasad ang mga balita kabahin sa mga dugoong panghitabo diin nalambigit na usab ang mga sakop sa fraternity.

Naay mga nangapagan sa pagpamusil diin ang mga suspek giingong mga fratmen nga nanag-away-away.

Ang pagdinumtanay sa mga nagkaribal nga fraternity anaa gihapon. Wa pa kini mapapas bisan pa sa gibalitang peace accord tali ning maong mga badlongong fratmen.

Sa atong nakita helpless kun wa gyuy mahimo ang mga tinugyanan sa balaod kalabot niining nagpadayong panag-away sa mga sakop sa nagkadaiyang fraternity.

Unsaon na man lang ang pagtapna niining mga bayolenteng panghitabo mugna sa panag-away sa mga fraternity?

Usa ka lay minister sa simbahang Katoliko misugyot nga ipaagi sa pag-ampo ngadto sa Kahitas-an nga unta masudlan og matarong nga panghunahuna ang utok ning maong mga badlongong elemento sa atong sosyedad. Suwayan ta kuno.