Kanunay’ng nagdali

Mga tawo ang niabot og katingala kun nganong ilang tinahud nga pari ang kanunay’ng magdali. Sa misa niini daw kaon-kaonon way labot sa pangasabang dili makaon og iro. Sa mga nobena sa Piyesta Senyor siya moadto dili aron magdebosyon kondili managinot aron ligid mailisdan na tawon. Arogante ug kanunay siya nga magpatahud kay lagi usa na siya ka tinamod. Dagway kanunay’ng nagkusmod daw mobudlot na lang ang iyang simod. Pastilan? Kay unsa man kaha ang iyang pagtan-aw sa Simbahan? Metrobank nga depositohanan? O dili ba kaha negosyo nga magpunay man siya’g ingon nga siya alakanse?

Pamalandong

Ang pagkapari dili propesyon kondili bokasyon. Mao nga ang mga halad sa mga tawo bisan pa man kun kini ilang obligasyon apan wala kini magpasabut nga bugtong rason aron panerbisyo lamo-lamoon. Nisimba ang mga tawo aron mag-ampo dili aron kasab-an sa paagi nga sukwahi sa maayong pamatasan. Kay ang pari magtutudlo. Maantigo siyang mosabot ug maantigong mo-edukar. Dili kini sukaranan sa isyu kun bag-o ka ba o karaan o dili ba kaha utokan. Hinunua gitawag sila aron mamahimong Sakramento sa Gugma ni Kristo alang sa Katawhan ug dili aron magboksidor ug modula sa kumkom-bira sa mga Sagradong Luna.

* * *

E-mail:  [email protected]