Abuso sa discretion

Human moangkon sa kasal-anan nga ilang nahimo sa atong balaud, ang upat ka mga hapon nga nasakpan sa akto nga naghimo og sex film didto sa isla sa Olango kaniadtong miaging semana gipakanaugan og silot nga multa lamang sa kantidad nga saiz mil pesos. Tungod niini mamahimo na kitang kataw-an ug pikatan lamang unya sa mga langyaw nga mobisita dinhi sa ato.

Ang artikulo 201 sa atong kodego penal nagkanayon nga ang mga maghimo og mga malaw-ay nga pasundayag pagasilotan kini sa pagkabilango sa unom ngadto sa dose ka tuig o pagpamulta sa kantidad nga saiz mil ngadto sa dose mil ka pesos o pagkabilanggo ug pagmulta.

Dinhi atong masabot nga anaa ra sa huwes kun asa sa maong mga silot ang iyang ipahamtang alang niadtong makalapas sa nahisgutang proviso, pamultahon ba niya kini, bilanggoon o bilanggoon ug pamultahon. Sa laktod nga pagkasulti discretion o kabubut-on lamang sa huwes ang pagpili sa maong mga silot nga maoy iyang ipahamtang ngadto sa mga nakalapas niini.

Apan bisan pa man kun discretion sa huwes ang pagpili sa silot nga iyang ipahamtang ngadto sa mga hapon, gitan-aw usab unta niini ang iyang moral responsibilidad sa pagpanalipod sa atong mga tourist spots ug kultura. Sa tulo ka klase sa silot nga kapilian sa huwes sa Lapulapu nganong gipili man niini ang pagpamulta lamang sa upat ka mga hapon sa kantidad nga saez mil ka pesos. Wa man lang gani makaabot og usa ka lapad ang iyang gipahamtang nga silot. Sa maong hukom gipikatan lamang kita sa mga bakang. Misamot ang atong pagkabarato dili lamang sa mga bakang kun dili ngadto na sa ubang mga langyaw.

Miangkon na ang mga hapon sa salaud nga ilang nahimo pero bisan pa man sa ilang pag-angkon gipamulta lamang sila sa huwes sa Lapulapu og sinsilyo. Nganong dili man pagkabilanggo bisan unom lamang ka tuig ang silot nga iyang gipakanaug, at least mohalang gamay ang atong balaud ngadto sa mga hapon nga naghimo og salaud? Abuso kini sa discretion! Kun nagpakabana ang atong piskaliya ug ang atong gobyerno sa discretion sa huwes nga naabuso, kinahanglang mangayo kini og reconsideration sa dili maayong hukom. Hukom nga nagpaubos sa atong dignidad. Hukom nga naghimo natong kataw-anan sa mga bakang ug ubang mga langyaw. Hukom nga nagdasig sa uban sa pagyama-yama ug pagbugal-bugal sa mga dapit nga atong gipasigarbo ngadto sa atong mga dumuduong.

Ang silot nga nakalatid sa artikulo 201 sa atong kodego penal ubos ra gani kini alang niadtong maghimo og malaw-ay nga mga pasundayag. Apan bisan sa kaubos na niini gipaubsan pa gayod kini sa atong huwes sa Lapulapu dihang iyang gipakanaug ang silot ngadto sa mga hapon nga miangkon sa salaud nga ilang nahimo.

Naunsa ba kining Lapulapu nga nagpabadlong man. Pipila ka buwan na ang nakalabay giabsuwelto usab sa ilang huwes ang amerikano nga mihingalan sa mga pinoy nga onggoy kana tungod kay wa kunoy partikular nga pinoy nga gihinganlan og onggoy. Gipapiyansa usab ang mga sakop sa Kidnap For Ransom nga nadakpan kana tungod kay ang kaso sa tag-as nga kalibre sa mga armas nga nakuha gikan kanila naabsorbed ra kuno kini sa kasong Usurpation of Authority nga gipasaka, resulta hangtod karon wa na gyod mopakita ang mga sakop sa KFR aron atubangon ang kaso nga gipasaka batok kanila. Karon bisan miangkon ang mga hapon gipamulta lang kini og unom ka libo ka pesos bisan kun aduna pa untay mas taas-taas nga silot nga puwedeng mapahamtang ngadto niini. Pagkalibog! AMBOOOOOT LAAAANNNGGG....