Mangayo og P10?
Gikan sa cellphone number 0926-2011958: “Good day, Sir. Kana bang mga polis sa Cordova mangayo og P10 sa mga driver sa multicab. Kada buntag gyud. May kuyog silang tanod. Luoy kaayo mi kay wa pa gani mi makasapi nag-atang na sila. Dako kaayo ang ilang masapi.” --
Gipatik ko kining maong text, dili tungod kay mituo ko sa alegasyon sa atong texter, kondili aron mahimoan kinig pakisusi pagsuta kun tinuod ba kini o dili. Manghinaot unta kita nga makabasa ang hepe sa kapolisan sa Cordova niining maong lindog aron iyang masubay kun kinsa sa iyang mga tawo ang naghimog tinonto. Niining ilang gihimo, matawag na sila’g “kutong cops” kun tinuod man.
Maayo unta kadto kun gihatag pa sa atong texter ang ngalan sa mga polis nga mangdelihinsiya nila aron dali rang ma-trace. Nindot sab unta kun lakip ang ngalan sa tanod nga kauban niini nakuha sa atong texter. Bisan pa man, ato gihapon kining pahimoan og aksiyon sa mga nahingtungdan. Tulibagbag kaayong pamation kun tinuod man ugaling kini. Dili angay pasagdan kining maong tinonto.
* * *
Sa laing bahin: “Sir, nigamit ko og fixer nakagasto na ko og P3,000 plus kay dinalian para sa school pero until now wala pa gyud ang akong papeles mo-one year na lang. Naa man siya’y kaila sa office maong makasulod siya didto.” -- 0918-6386137 (July 12, 2007 --03:24:20pm)
* * *
Salamat sa kasayoran nga imong gihatag. Hinaot nga kakuhaan og pagtulon-an sa atong kaigsuonan kining imong kasinatian. Dili lagi maayo nga mogamit tag serbisyo sa fixer kay kahasol ray atong dangatan. Manghimasin tuod ta nga madali pero palpak diay. Dili gyud angay nga modangop ta og fixer.
Bisan gusto tang magdali, magsakripisyo lang god kitag pila o linya aron pagseguro nga dili mopalpak ang atong transaksiyon. Kun magsalig tag fixer, basin kita hinuon ang maproblema sa kapulihay. Unsaon na lang.
Salamat sab sa kasayoran nga imong gihatag nga duna gyud diay kaila sa buhatan ang mga fixer maong makasulod sila sa dakong kasayon. Pastilan!
(Sumbong ug reklamo? Text sa 0910-8105522)
- Latest
- Trending
