Politics of convenience

Sa iyang privilege speech nga giulohan og “I Accused”, gipasanginlan ni kanhi Senador Teofisto “Tito” Guingona si kanhi Presidente Joseph “Erap” Estrada og daghang kalapasan sa iyang pagpangatungdanan. Iyang gipasanginlan si Erap Estrada nga nakalapas sa atong batakang balaud, midawat og suborno, nangurakot ug nagbudhi sa pagsalig sa katawhan nga mibutang kaniya sa Malakanyang. Tungod ning maong pasangil, giimbestigahan si Erap sa mga kauban ni Guingona sa Blue Ribbon Committee sa Senado. Ang imbestigasyon sa Senado nakapaaghat usab sa mga ka partido ni Guingona sa ubos balay balauranan sa pagduso og reklamong impeachment batok sa kanhi Presidente sa nasud. Gipanawagan usab nila ang pagpakanaug ni Erap sa Malakanyang. Sa pagbalitok sa sinaligan ni Erap sa ubos balay balauranan nga si Speaker Manny Villar, naabot sa Senado ang reklamong impeachment batok ni Erap.

Sa paghusay sa reklamong impeachment sa Senado, (sa ilang sinultihan) konbiktado na nila ni Senador Loren Legarda, Teofisto “Tito” Guingona, Renato Cayetano ug mga kaubang kontra partido si Erap. Gumikan sa ikaduhang envelop ug sa dramatic walk out nga gihimo sa mga Congressmen-prosecutor nga gipangulohan ni Joker Arroyo naputol ang bista sa impeachment ug mibanos ang people power two nga maoy nakapalayas ni Erap sa Malakanyang. Si Gloria Macapagal Arroyo napresidente samtang si Teofisto Guingona na bise presidente.

Si Erap napalagpot sa Malakanyang ug karon nag-atubang og kasong plunder sa Sandiganbayan tungod sa pasangil ni Senador Teofisto Guingona. Apan karon ato nang nakita si kanhi Senador ug bise presidente Teofisto Guingona nga mikuyog na sa mga kaalyado ni Erap nga nanawagan nga absuweltuhon si Erap sa kasong plunder nga iyang giatubang sa Sandiganbayan.

Unsa may buot ipasabot ni Tito Guingona sa iyang pagkuyog sa panawagan nga absuweltuhon si Erap sa kaso niining giatubang, nga diin usa siya mismo sa mga nagpasaka niini? Buot bang ipasabot ni Tito Guingona nga iya lamang gibutang-butangan si Erap sa maong kaso ug mga pasangil hinungdan nga gusto na niya kining absuweltuhon sa Sandigan bayan? Buot bang ipasabot ni kanhi Senador ug bise presidente Tito Guingona nga sakto si Erap sa iyang pagpamugos nga wa siyay sala ug dili tinood ang mga pasangil nga iyang giatubang karon diha sa Sandiganbayan?

Unsa may buot ipasabot ni Tito Guingona ning iyang pagkuyog sa mga nanawagan nga absuweltuhon si Erap? Buot bang ipasabot ni Tito Guingona nga tiguwang na gayod siya kay nakalimot na siya nga usa siya mismo sa mga nagpasaka ning kasong plunder nga giatubang karon ni Erap diha sa Sandiganbayan? O usa si Tito Guingona sa mga lig-ong buhing ehemplo sa gitawag natong Politics of Convenience.