Bantayanan gyud ang mga snatcher kay anaa kini sa bisan asang dapit ug moatake kini sila bisan unsang orasa basta makapabor ug dunay makursonadahan nga biktimahon. Dunay mga dapit nga identified na kaayo nga gipostehan sa mga snatcher. Angay kitang masayod niini aron kita makabantay.
Usa ka magbabasa niining lindog mi-text nga nagkanayon: “Good day. Concern lang ko. Diha dapit sa N. Bacalso Avenue unahan sa taytayan naa dihay daghang mag-estambay nga snatcher. Manglabni og kuwentas ug bag. Maghilak intawon ang mabiktima kay wala may makatabang. Naay polis usahay diha pero mawala ra pod og kalit ang snatcher. Hapit kada gabii naa gayoy mabiktima dihang dapita. Abtik kaayo sila. Mga batan-on pa ra ba.” -- 0926-8958583 (April 29, 2007 -- 14:21:28)
Sa akong ihap, dili kay usa ra ka tulay ang gilatasan sa N. Bacalso Avenue busa dili kaayo specific ang text nga atong nadawat. Pero nagtuo ko nga ang gitumbok sa atong texter posible nga ang tulay nga maoy labing duol pa sa terminal sa mga sakyanan nga magbiyahean paingon sa south. Pagbantay gyud mo aron dili mo maghilak kun mabiktima. Abtik ra ba kining maong mga isnatser kay kalit ra sab nga mahanaw kun makamatikod na nga may mga polis na sa ilang duol.
* * *
Sa laing bahin: “Naa unta koy reklamo bahin nianang dispatser sa Metro Mandaue. Kusog kaayong manghingi. Bisan usa ra ka pasahero ang mosakay mangayo gihapon.” -- 0918-3735178 (April 29, 2007--12:12:38)
Abusado gyud bitaw kanang mga dispatser. Dili lang kanang dispatser diha dapit sa may Metro Mandaue maoy abusado kondili ang tanan gyong mga dispatser nga naglihok sa lainlaing dapit sa Metro Cebu. Maayo unta kun ang matag dapit makapanday og anti-dispatching ordinance nga may ngipon gyud nga makahambat nianang abusadong mga dispatser. Bisan unsaon pagbali-bali ug pagtuali ang anggulo, extortion gyud ang gihimo nianang maong mga dispatser. Dili maayong magpadayon ang ilang tinonto.
* * *
(Sumbong ug reklamo? Text sa 0910-8105522)
