Motorista napasok sa bus

Angay'ng dalion sa kadagkoan sa Commission on Elections ang pag-asikaso nga mahatag na ang kinatibuk-ang honoraryom alang sa mga magtutudlo nga miserbisyo atol sa eleksyon ug sa canvassing.

Grabe kaayo ang ilang kakapoy ug mao nga dili maayo nga dugay-dugayon ang paghatag sa ilang honoraryom. Akong nahibaw-an nga dunay ubang magtutudlo nga nakadawat pa lang og katunga sa ilang honoraryom.

Karong Miyerkules, ang konseho sa dakbayan moawhag sa Comelec ug Department of Education nga magtinabangay aron nga madawat na sa mga maestra ang ilang honoraryom.

* * *

Karong Biyernes kon mahinayon, mosugod na kuno paglihok ang Squatters Prevention Encroachment Elimination Division sa paglimpyo sa usa ka aseras nga giukopahan karon sa mga sidewalk vendors.

Angay lang kay samok na g'yod kaayo ang atong mga aseras. Akong awhagon si Major Vicente Mercado, ang hepe sa SPEED nga dili moatras sa ilang plano.

Tinuod nga malooy kita sa mga vendors, apan dili mahimo nga magpasuwabi ang atong kalooy kanila unya daghan ang masakripisyo.

* * *

Daghan ang nagpangutana kanako kabahin sa kapitan sa barangay nga gikataho nga nangilkil sa tagdumala sa usa ka dakung idipisyo sa iyang lugar.

Dunay uban nga nakatag-an duna say uban nga wala. Swerte kadtong nakatag-an. Gibasi nila ang ilang pagtagna sa pagtan-aw nila sa maong kapitan.

Dili lang usa nako ibutyag ang ngalan kay ambot og moreklamo ba ang gikilkilan. Paminaw nako, dili g'yod moreklamo kay siya man ang nakabentaha.

Nagtoo man god tingali ang tagdumala sa maong building nga malibre na ang iyang kakuwangan sa mga dukomento kon mobayad siya sa kapitan.

Kini maoy dakung problema niya nga atubangon sa pagka karon. May mireport man god nako kabahin sa binuang sa maong kapitan.

Wala dayon ko motoo apan ang paryente ug higala sa tagdumala sa maong building mikonpirmar kanako sa maong report nga unang gitug-an sa akong informer.

Kon hingpit na nga mag-operate kining maong dakung building sa maong lugar, sigurado nga makasinati og drainage problem ang maong dapit.

Kini maoy rason nga naabot kanako ang reklamo sa mga lumulopyo sa maong barangay.

Ako pa kining gitrabaho sa pagka karon. Tan-aw nako, mora'g dunay mga kawani sa Office of the Building Officials sa City Hall nga magkurog-kurog kon mapamatud-an nga duna silay binuang.

* * *

Hangtud sa pagka karon, ang kapolisan sa Waterfront police station wala g'yod modistino og ilang sakop nga makaabag pagpahapsay sa mga sakyanan diha atubangan sa ilang police station panahon sa hapon.

Akong awhagon ang hepe nga si Koronel Pedrillo Villamor nga distinohan g'yod og polis nga makapatuman og kahapsay sa maong dapit, ilabi na panahon sa hapon nga mag-ilogay ang mga sakyanan paingon sa pantalan.

Dili maayong magsalig na lang kita sa traffic division kay dili man usab kanunay ang maong gimbuhaton. Dili ba Kernel Villamor?

Sa dili ka pa moadto sa imong pag-tennis, siguroa nga makadistino kana og polis nga modumala sa pagpahapsay atubangan sa imong polis station.

* * *

Kadtong dunay mga komentaryo sa atong mga isyu nga gihisgotan, palihug ipadala sa akong e-mail address ([email protected]) o kaha suwata ug ipadala kanako diri sa opisina.