EDITORYAL — Eleksyon nagkaalegre

Nagkaalegre -- nagkamakalingaw -- na ron ang kampanya sa eleksyon. Labi na diha sa Mandaue.

Human nganlig Kano sa iyang kaatbang, si kandidato pagka-mayor Jonkie Ouano mibawos nga ang pundok batok kaniya ug sa iyang Power Team adunay mga sakop nga ungo ug asawang.

Sumala sa balita, mipahimangno ang Power Team ngadto sa mga mabdos nga babaye sa Mandaue sa dili pagpakiglamano (hand shake) ngadtos mga kandidato nga kauban ni Jonas Cortes, ang kaatbang ni Jonkie sa lumba sa pagka-mayor.

Duna kunoy ungo sa pundok oposisyon.

Suma pa sa impormasyon nga atong nadawat, nangatawa lang ang mga tigpaluyo ni Jonas apan duna gyo’y pipila ka mga mabdos nga milikay pakiglamano ni bisan kinsang kandidato apil na gani ang mga sakop ni Jonkie.

Alegre. Mas maayo na lang ni kaysa sa magpinusilay ang mga kandidato ug ilang mga tigpaluyo!