Demokrasya sa mata ni Cory

Gihangop nako ang tanyag nga mahinabi ug ma-interview si kanhi Presidente Cory Aquino atol sa iyang pagbisita sa ABS-CBN Central Visayas aron ikampanya ang iyang anak nga modagan pagka-senador. Human sa pipila ka minuto, niabot si Mrs. Aquino sa among buhatan uban ang usa ka higalang Sugbuanon, anak ug usa ka bodyguard. Sa ako palang pagsugat ug paglamano sa kanhi presidente, nilab-as sa akong panumduman ang pipila ka yugto sa kasaysayan kung kanus-a nabawi sa mga Pilipino ang demokrasya gikan sa diktadorang Marcos.

Singko anyos palang ko dihang nahitabo ang piniliay tali ni kanhi presidente Ferdinand Marcos ug kanhi presidente Cory Aquino. Bisan kung walay telebisyon sa among lugar niadtong mga panahona, walay puas ang among pagpaminaw sa radyo nga de batirya. Tungod kay wala pay linya sa kuryente niadto sa among kabus nga probinsya, kontento na ang mga tawo nga magpunsisok sa "transistor radio" aron makasunod sa mga panghitabo kaniadto sa kauluhan ug dinhi sa Sugbu. Bisan kung dili ko makabotar, apan kusganon nakong gikombensir ang akong mga kaduwa nga bata nga aghaton ang ilang mga ginikanan nga suportahan si Cory Aquino. Aduna pay mga higayon nga gidibate nako ang akong mga higala kansang mga ginikanan ato-a dapig sa diktador.

Sa mata sa usa ka bata sama nako niadtong mga panahona, dili lang kombati sa mga hamtong ang gisaw-an sa mga Pilipino apan sa tanan nga adunay pagpakabana nga makuha og balik ang demokrasya ug kagawasan gikan sa rehiming Marcos. Walay gisipyat nga anggulo ang mga bata kaniadto sa mga kalambuan sa politika bisan pa og dili makabotar ug dili halos madungog ang tingog sa prinsipyo ug baruganan sa mga isyu. Ang mahinungdanon alang sa mga bata kaniadto nga momata ang kadaghanan nga nag-saulog sa kadaugan.

Unsa may mahitabo kung ang usa ka bata nga aktibo sa panghitabo kaniadto mahimamat ug makahinabi ang tawo nga maoy nangulo ug nidala sa tingog sa mga tawo batok sa administrasyong Marcos? Walay undang ug nagsupot-supot ang mga pangutana kang Cory Aquino kabahin sa mga panghitabo kaniadto nga wala mapagawas sa limitado ug kontroladong media. Matud ni Cory, duol sa iyang kasing-kasing ang Sugbu tungod kay dinhi siya nitago atol sa unang mga adlaw sa "EDSA People Power" kung kanus-a gihulga ang kinabuhi ni Cory ug sa iyang pamilya. Lab-as pa sa huna-huna ni Cory ang iyang pagtago sa Carmelite Monastery uban sa iyang anak nga si Kris.

Dugang ni Cory, nanghuwam lang siya og sinina kang Nancy Cuenco atol sa iyang pagtago dinhi sa Sugbu. Ug mismong si Congressman Antonio Cuenco pa ang nagmaneho sa gisakyan ni Cory ug sa iyang anak gikan sa tugpahanan paingon sa monasteryo. Matud ni Cory, dili man sa Sugbu ang sentro sa People Power, apan dako ang nahimong papel sa mga Sugbuanon aron subling makab-ot ang demokrasya ug mabalilk ang paglaom sa mga Pilipino. Sa iyang pagduaw sa Sugbu, wala kalimti ni Cory ang pagbisita sa mga lugar ug personalidad nga nagbukas og da’an alang sa kalampusan sa pakigbisog batok sa gamhanang administrasyon kaniadto.

Sa mga mata ni Cory, makita ang mga kasinatian sa pagkab-ot sa demokrasya ug pakigbatok sa mga hulga ug pagsuway sa kinabuhi. Gikan sa usa ka inahan, lola ug lider, kinsa giila sa usa ka sikat nga "international magazine" tungod sa iyang paningkamot nga mahibalik ang gipangayong kagawasan sa mga Pilipino, walay laing mosulod sa imong huna-huna gawas sa pagsaludo ug pagdayeg sa maong nilalang. Kapin baynte ka tuig human nagmalampuson ang mga Pilipino sa pakigkumbati sa EDSA, matud ni Cory hangtud karon, walay puas ang pagbarog ug pakigharong sa katawhan sa mga pagsuway sa kinabuhi.

Kung kaniadto, tataw kung kinsa ang kaaway sa mga Pilipino ug klaro ang isyu nga gilalisan, karon mas daghan ang mga nagpaka-aron-ingnon ug mas komplikado ang mga isyung gisaw-an sa katawhan. Sakto ang giingon ni Mrs. Aquino, ana-a sa matag usa ang kausaban ug anaa sa matag Pilipino ang kagawasan gikan sa krimen, pangurakot ug pagpanamastamas sa pagkatawo. Ang piniliay sa Mayo ang magbukas og katumanan sa tinuoray nga kausaban.