Maghupot og shabu

Gikan sa cellphone number 0927-9203026: "Good day. Naay among silingan nga nadakpan nga naghupot og shabu. Napulo ka pakete nga shabu. Unsay silot niini? Thanks." -- 0927-9203026 (March 8, 2007--12:16:31)

Ako na kining gihisgotan sa gula sa Banat News niadtong Marso 8, 2007 pero posibleng wala ka makabasa sa maong lindog. Alang sa imong benepisyo ug sa ubang wala pa masayod, tukion ko kini pag-usab. Atong ibase ang pagtuki sa Republic Act 9165 diin gibahin ngadto sa upat ka klasipikasyon ang kasal-anan sa paghupot ug pagyuhot og illegal nga butang o drugas sama sa shabu.

1. Sa kasong pagpayuhot o kaha nasakpan nga naghupot og shabu, ang silot mao ang 12 ka tuig ug usa ka adlaw nga pagkabilanggo ug multa nga P300,000 hangtod sa P400,000 kon ubos ra sa lima ka gramo ang shabu. Dili pinakete ang basehan.

2. Kun ang shabu nga gihuptan o gipayuhot miabot og lima ka gramo apan ubos ra usab sa napulo ka gramo, ang silot niini mao ang 20 ka tuig nga pagkabilanggo ngadto sa life sentence uban ang multa nga P400,000 hangtod sa P500,000.

3. Kun ang shabu nga gihuptan o gipayuhot miabot og 10 gramos pataas apan wala sab makaabot og 50 gramos, ang penalty niini mao ang life imprisonment o pagkabilanggo sa tibuok kinabuhi. Kini giubanan usab sa multa nga P400,000 ngadto sa P500,000, samtang multa nga gipahamtang sa 5 gramos pataas apan wala makaabot og 10.

4. Kun ang shabu nga gihuptan o gipayuhot nakaabot og 50 gramos pataas, ang silot niini mao ang life imprisonment to death o pagkabilanggo sa tibuok kinabuhi ngadto sa kamatayon uban ang multa nga P500,000 ngadto sa P10,000,000. Magdepende kana sa kabug-at sa merito sa kaso base sa pagtimbangtimbang sa korte.

Sa kaso sa imong silingan, wala koy ideya kun unsay silot niana kay pinakete man ang imong gihisgotan. Dili man pakete ang gibasehan sa balaod sa pagpahamtang og silot sa salaod sa pagpayuhot ug paghupot og shabu kondili pinaagi sa gramo. Kun imong masuta kun pila ka gramo ang napulo ka pakete nga shabu, tamdi ang atong gihisgotan sa unahan og may ideya ka na kun unsay silot nianang imong silingan. Bug-at ang silot ning maong salaod busa angay gyud kining likayan.

* * *

(Sumbong ug reklamo? Text sa 0910-8105522)