Ang bra ug ang pari

Human sa lima ka buwan nga imbistigasyon, napasaka ra gyud ang kaso batok sa pari nga gipasanginlang nagbinastos sa mga tinun-an sa Abellana National School atol sa usa ka religious seminar.

Ang National Bureau of Investigation misang-at sa pito ka counts sa kasong acts of lasciviousness in relation to child abuse batok ni Padre Benedicto Ejares niadtong Miyerkulis sa hapon didto sa piskaliya.

Pito lang hinuon sa kapin sa 20 ka giingong mga biktima ni Ejares ang misang-at og reklamo nga maoy gibasihan sa NBI sa pagpasaka sa kaso. Basi sa pamahayag sa mga biktima nga gihinol sila ni Ejares samtang sila nangumpisal. Gipitik pitik ang strap sa ilang bra ug gigitikgitik sila samtang nangumpisal.

Ang kadagkuan sa Artsidyosisis sa Sugbu daling nakatabon sa nahimutangan ni Ejares sa dihang gipangutana kun anaa pa ba siya sa pinuy-anan sa cardinal nagpuyo. Si Msgr. Achilles Dakay, tigpamaba sa simbahan, arogante pa sa dihang gipangayoan og reaksiyon sa hitabo.

Si Dakay miingon nga wa na silang masayod kun hain karon si Ejares, butang nga nakapabalaka sa publiko kun itahan ba siya sa simbahan sa higayon nga mapasaka na ang kaso sa korte ug kon duna nay warrant of arrest batok niya.

Sukad sa sinugdanan niining maong kontrobersiya dayag ang pagkakonsintidor sa kadagkuan sa simbahan. Nagdumili sila pagkooperar sa imbistigasyon, wa gyud gani sila mohatag og pangan sa pari sa dihang gipangayo sa DSWD ug sa NBI.

Kun dili pa sa paningkamot sa NBI, di gyud mailhan kon kinsa ang bastos nga pari nga nanghinol sa mga estudyante. Karon nga napasaka na ang kaso, hinaut nga ipakita sa mga opisyal sa simbahan ang hustong pamatasan ug unsay husto nilang buhaton sa mga sitwasyon nga ingon niini.

Ayaw og tagu-i ang inyong sakop nga gipasanginlan og seryosong pasangil sa pagpamolistiya og mga batan-on.

* * *

Ingon akong amigo nga si Atty. Paul Clarence Oaminal nga kon ganahan gyud si Padre Ejares magduwa og bra andam kuno siyang modonate og bra alang niini aron iyang duwa-an.

Mas maayo nang bag-o ug wa isul-ob ang bra nga duwaan kay way asunto. Lisod gyud tinuod kun ang bra nga atong duwaan gisul-ob og babaye, labi pa og minor de edad kay mag-atubang ta og kaso inig human.Tan-awa og unsay nahitabo ni Ejares.

Kun wa pa isul-ob ang bra nga matud pa iyang giduwaan ang strap, bisan pa siguro og iya tong gigamit pagpanirador og siloy wa gyuy moargabyo niya.

* * *

[email protected]