Masuko kun badlongon

Aduna gyoy mga tawo nga abusado ug hambogero. Kun makonektado gani sila sa usa ka buhatan sa kagamhanan, himuon kini nilang instrumento sa pagpanghadlok ug pagpakurog sa ubang tawo. Mag-abuso sila. Nagtuo sila nga kumo kay na-connected sila sa usa ka buhatan sa kagamhanan, sila na gyud maoy hawod. Wala nila hunahunaa nga ang kuwarta nga gisuweldo kanila naggikan sa buhis sa katawhan.

Dugtong niini, nakadawat kog text nga nagkanayon: ''Good day, Sir. Naa lang koy reklamo. Security guard ko sa USJR-Basak. Kanang tawhana nga naa sa LTO abusado kaayo. Masuko kun badlongon bisan naa sa tunga sa karsada ang iyang sakyanan. Magkuha man siya sa iyang anak kada hapon. Ako siyang giingnan nga adto sa parking area ipahiluna ang iyang sakyanan kay matrapik ang karsada. Ingon siya nga walay magbuot niya kay naa siya sa LTO nagtrabaho." -- 0910-4111672 (March 8, 2007 -- 10:31:12)

Kun tinuod man ugaling kining gisumbong sa atong texter, makaingon ko nga hilas ra kaayong manulti kanang maong tawo nga naa sa LTO. Unsa to, walay magbuot niya kay naa siya sa LTO nagtrabaho? Hilas! Ang pagtrabaho sa buhatan sa LTO usa na ba diay ka permiso o gahom aron dili na mabadlong ang usa ka tawo bisan og dili na husto ang iyang gihimo? Pagkatulibagbag nga pamation!

In fairness ngadtong maong tawhana dili lang una nato siya kondenahon. Apan ako lang siyang pahinumdoman nga walay ganahan og tawong abusado. Gawas pa, ang pagtrabaho sa LTO dili oportunidad aron siya ilhong hawod ug hari sa karsada. Kahilas gud tawon niya. Binuang man kanang iyang giluwatan nga pamahayag nga walay magbuot niya kay naa siya nagtrabaho sa LTO. Unsa man diay nang LTO, gingharian sa Ginoo. Pastilan baya, uy. Nganong magpahawod-hawod man gyud!

Ang angay untang buhaton ning tawhana mao nga iyang ipakita nga usa siya ka ehemplo sa pagtuman sa balaod sa trapiko ilabi na nga anaa siya magtrabaho sa LTO. Pero sa iyang gihimo, ingon sa giyatakan man hinuon niya ang reputasyon sa buhatan nga iyang gialagaran. Dili maayo kanang imong gibuhat, Mr. D. Wala ikaw ing katungod nga magpahawod-hawod kay ang mga magbubuhis maoy nagsuweldo nimo. Timan-i gyud na pag-ayo, Sir.

(Sumbong ug reklamo? Text sa 0910-8105522)