Made in Danao

Mas naila ang dakbayan sa Danao sa pagpanghimo og armas. Ug karong nagsingabot ang eleksyon, mas nagkataas ang demanda sa paltik nga armas luyo sa Comelec gun ban nga gideklarar sa tibuok nasud. Matud sa mga nabuhi sa paghimo og puthaw nga armas, paspasay ang ilang trabaho karon tungod sa sunod-sunod nga order gikan sa ilang mga financier. Giingong alang sa security agencies ang maong mga armas. Tungod kay barato apan de kalidad, mas gidugok sa mga kustomer ang paltik sa Danao nga dili lang dinhi sa nasud nabantog, apan sa uban pang dapit sa kalibutan.

Siete sientos pesos lang ang baligya sa 38 caliber revolver kung direktang paliton sa ilegal nga tig-gama. Apan doble na ang presyo kung adto na ni paliton sa giingong financier sa mga "gun makers". Dili momenos kinyentos ka mga tawo ang nalambigit sa pag-gama ug armas nga walay pagtugot sa gobyerno. Samtang moabot sa libuan ka mga tawo ang nalambigit sa operasyon sa pagpalusot sa ilegal nga mga armas paingon sa kamot sa mga mamalitay ini. Kung pangutan-on ang mga ilegal nga tig-gama ug armas, wala sila’y dautang gihimo tungod kay igo lang silang nangita og panginabuhian nga ilang ika-buhi sa ilang mga anak ug apo.

Apan kung unsa ka sayon alang sa mga "illegal gun makers" ang pagpalusot sa ilang mga produktong pusil, mao usab ka lisud alang sa Workers League of Danao kon WORLD Multi Purpose Cooperative ang pagbaligya og armas. Ang kooperatiba ang usa sa gamay nalang nga grupo nga gitugotan nga maka-himo ug makabaligya og armas sa legal nga paagi. Ang nakapait, gikan Hunyo sa miaging tuig, kung kanus-a napupos na ang ilang permit, hangtud karon, wala pa sila mahatagi og bag-ong pagtugot nga makabaligya og armas. Ang nahitabo sa Danao, mas sayon pa hinuon alang sa mga ilegal nga tighimo og armas ang pagbaligya sa produkto itandi sa mga legal nga tig-himo.

Gisuwayan na pag-kombensir sa mga "legal gun makers" ang mga nabuhi sa ilegal nga paagi nga motapon sa ilang grupo. Giingong duha lang sa kinyentos ka mga naghimo og armas sa tago ang nipadayag og interes nga motalikod sa ilegal nga binuhatan. Kinsa may buot motapon sa legal nga grupo, kung hangtud karon, gi-lisud-lisud pa ang "renewal" sa ilang permit? Kinsay may buot nga mo-apil sa kooperatiba kung hangtud karon, mas daghan pa ang ilang mahimong armas itandi sa mga tawo nga sakop sa kooperatiba?

Dili makasabot sa WORLD Multi Purpose Cooperative kung diin sila nagkuwang kay kompleto man sila sa mga dokumento nga gikinahanglan aron mahatagan og permisong makabaligya og armas. Ang nahitabo karon, nagsige lang og dawat og order ug pagpanghimo og armas ang kooperatiba apan dili kini nila mahimong ma-ipagawas sa Danao City tungod sa kakuwang sa permiso. Dili halayo nga matintal ang mga legal nga tig-himo og armas nga motapon na hinuon sa ilegal nga grupo tungod sa paglisud-lisud kanila. Matud sa kadagkuan sa kooperatiba, daghan na sa ilang mga miyembro ang mipahawa ug mas gipiling mohimo og armas sa tago nga paagi.

Giingong may mga politiko nga nanguha karon og daghang sekyu samtang nagkaduol na ang piniliay. Dili lang simpleng trabaho ang himuon sa maong mga sekyu tungod kay giingong sila ang bag-ong goons sa mga politiko ug mga paltik nga armas gikan sa dakbayan sa Danao ang ipagamit kanila. Daling gibasura sa usa sa labing dako nga training center sa mga security guards ang maong balita tungod kay dili sayon alang sa usa ka politiko ang mopakyaw og sekyu aron gamitong goons.

Apan kung ang usa ka negosyante nga may daghang negosyo maoy mokuha og daghang sekyu wala kini problema. Kung tan-awon kinsa ang dagkong supporter sa usa ka kandidato, sila ang mga negosyanteng may personal nga interes sa pagpaluyo ug usa ka kandidato. Hinungdan nga dili halayo nga mga sekyu sa usa ka negosyante, mao ra usab ang gamitong sekyu o goons sa usa ka politiko.