EDITORYAL — Sidewalk parking nasab

Ang illegal sidewalk parking subli nasang gihisgut-hisgutan sa mass media lakip na karon ang website sa City Hall.

Dili na maihap ang higayon diin misaad ang kagamhanan sa siyudad nga ilang hunongon ang paggamit sa sidewalk isip parkinganan o ba kaha garahian sa mga sakyanan. Apan sa sulti ra diay to. Ug sa press release.

Daghang tag-iyag sakyanan nga makapalit og awto apan dili makapahimog garahe sa maong awto. Anha ra igarahe daplin sa dan. Kay wa may mobadlong nila.

Naay mga lungsoranon nga mireklamo batok niini. Apan ang mga opisyal sa siyudad walay political will sa pagpatuman sa ilang kamandoan.

Samot na gyud ron kay panahon sa eleksyon. Dili angay’ng hilabtan kining mga tag-iyag sakyanan nga nagtuo nga silay tag-iya sa kadaplinan sa mga dan.