Karon, dad-on ko ikaw sa langit..

Duha ka kawatan ang dungan nga gilansang uban ni Kristo atol sa adlaw nga siya gipasakit sa krus. Ang usa gilansang sa iyang tuong bahin samtang ang usa sa iyang wala. Sa dihang hapit na mabugtui sa ilang ginhawa ang duha ka makasasala, ang kawatan sa walang bahin ni Kristo mihagit kaniya nga kung siya ang tinuod nga manunubos, luwason niya ang iyang kaugalingon ug iapil siya sa pagluwas ini. Samtang ang kawatan sa tuong bahin sa Ginoo mihangyo nga i-uban siya ni Kristo ngadto sa langit human siya maghinolsol sa iyang mga kasaypanan. Sa walay pagduha-duha nipasalig ang Diyos kaniya nga dad-on siya sa langit diha-diha dayon.

Atong gisundan ang mga panghitabo sa dakbayan sa Mandaue ug Lapu-Lapu dihang pormal nang gipagawas ang "preventive suspension order" sa Ombudsman. Sa walay paglangay, gidawat ug gihangop ni Lapu-Lapu City Mayor Arturo Radaza ang resulta sa imbestigasyon. Apan baliktad ang nahitabo sa dakbayan sa Mandaue tungod kay kapin usa ka adlaw nga nagbarikada ang mga taga suporta ni Mayor Thadeo Ouano aron dili makasu'd ang taga DILG nga mohatod sa suspension order. Wala magpasabot nga sad-an na ang duha ka opisyal ug lain pang dise siete ka mga taga city engineers ug DPWH sa giingong pagpaburot sa presyo sa decorative lampposts nga gipahimutang sa kadalanan alang sa ASEAN summit.

Duha ka dagway sa duha ka mayor, duha ka reaksyon sa duha ka lider ug managlahing punto gikan sa duha ka kampo human gipagawas ang suspension order. Sila ra ang nahibawo kung sad-an ba sila sa maong pasangil. Sila ra ang mas nasayod kung may tulobagon ba sila sa publiko, sa kahitas-an ug mismo sa ilang kaugalingon. Sila ra ang mas nahibawo kung limpyo o nagkabulingit ba ang ilang tanlag. Sila ra ang mas nahibawo sa mamahimong epekto sa ilang tagsa-tagsa ka reaksyon sa maong isyu.

Apan dili kalikayan ang pagduda sa publiko human sa managlahing lakang sa duha ka mayor. Alang nako, makatabang sa kandidatura ni Radaza ang iyang paghangop sa suspensyon labi pa nga nakita sa telebisyon ang iyang pakiglambigit sa iyang bise mayor, kinsa maoy iyang kontra karon pagkamayor, aron itugyan ang iyang liderato sa mosunod nga mga adlaw. Tinuoray man o dili ang aksyon ni Radaza apan alang sa publiko nga nagsunod sa maong "political drama", dakong puntos alang sa mayor ang iyang pagdawat sa suspensyon. Ang mayor sa Mandaue, sa pikas bahin, maoy mag-antos sa pag-kompara sa publiko sa nahimong aksyon human migawas ang balita sa suspension order.

Sa Japan, usa ka mapa-ubsanon ug labing halangdon ang pagpakamatay sa usa ka lider sa gobyerno o sa dagkong kompaniya ang pagkutlo sa iyang kinabuhi kung malambigit sa korapsyon o pagpangawkaw. Ang "hara kiri" mao ang pagkutlo sa kinabuhi sa usa ka tawo nga gipasanginlan o napamatud-ang kurakot pinaagi sa pagdunggab sa iyang kaugalingon gamit ang espada. Nagtuo sila nga pinaagi sa maong pagpakamatay, malimpyo ang dungog ug mapapas ang kasaypanan sa usa ka tawo nga nalambigit sa pagpangawat.

Apan dinhi sa Pilipinas, wala pay bisa'g usa ka lider sa gobyerno ang nasilotan tungod sa korapsyon. Hinuon daghan ang mga nanggawas nga pasangil apan wala pay nahukman nga kasaypanan ug wala pay dakong lider sa gobyerno ang nataral tungod sa kurapsyon. Dili na ta mahibong ug moigking sa resulta nga nigawas sa usa ka pagtuon nga ang Pilipinas ang numero unong kurakot sa tibuok Asya.

Sa pagsugod sa semana santa, walay bisa'g usa ka tawo ning kalibutana ang maka-ingon nga limpyo siya ug walay kasaypanan nga nahimo. Kitang tanan, madato man o makabos, ma-ordinaryong molupyo man o politiko, ma tiguwang man o bata, adunay kasaypanan nga nahimo. Apan ang nakalahi kay si kinsa kadtong kinasing-kasing nga nagbasol sa iyang kasaypanan maoy makadawat sa hingpit nga pasaylo sa kahitas-an. Tungod kay nagpasakit si Kristo sa krus aron kita matubos sa mga kasal-anan, angay lang nga atong itugyan ang atong kaugalingon ngadto sa iyang kasakit ug pag-antos.