Sa iyang interview uban kang Leo Lastimosa, mitin-aw si Tingting nga samtang mipahulay na unta siya sa politika, kaylagi, wa siyay kwarta, apan, wa siya mo-retire sa iyang pagka-Pilipino.
Ug isip Pilipino, kinahanglan manginlabot sa mga kalihokan ug mga butang lungsodnon. Matud niya, daghan ug dagku ang mga isyo nga giatubang karon sa lungsod, apan, ang atong mga tinugyanan sa Kongreso nagpakahilom lang.
Sa ato pa, wa sila manginlabot sa mga isyo kay tingali unyag kasuk-an sila sa mga gamhanang politiko nga alang nila, nautangan nilag kabubut-on. Sa ato pa, sila ang ilang gialagaran, sila ang ilang mga agalon, ug dili ang lungsod.
Kon mahinayon man, ug kon ang lungsod mosalikway kaniya, kaylagi, way kwarta ug way partido, di siya mahadlok nga mapilde, kay at least, matud niya, duna siyay nahimo, ug dili makasukmat kaniya ang lungsod ngano nga nangiyugpos lang siya atubangan sa mga kontrobersiya nga giatubang karon sa lungsod.
Mihagit siya kang Leo, paghingalan sa mga investors ug mga negosyante nga iyang gipangayoan og padangog aron kahatagan og kasayon ug proteksiyon ang ilang patigayon. Ingonman, miawhag siya paghingalan sa mga contractor nga iyang gipadugo aron makadaug sa bidding.
Kining maong development makausab sa hulagway sa dagan sa politika sa 6th district. Magkasangka sila si Nerissa. Ug kun mahinayon si Quisumbing, it's going to be a three-cornered fight. Alegre.
Si Tingting lumad nga taga-isla sa Mactan. Sa ato pa, iya ang Lapu-Lapu ug Cordova. Ang mga Radaza diehards ug mga Norma loyalists, mobotar gyud sa taga-Opon. Dili ma-solo ni Nery ang Mandaue ug Consolacion. Magbahin pa sila si Quisumbing, ug duna gyuy mapisik kang Tingting, dugang sa solid votes sa Lapu-Lapu ug Cordova.
Dunay mihunghong kanako nga di kinahanglan mag-atbang sila si Nery ug Tingting. Mahimo nga mag-uban sila, apan si Nery pagka-Mayor, si Cortes ang bise, ug si Quisumbing balik sa Provincial Board. Lig-on nga team batok sa mga Ouano, di ba? Lipay si Tomas ini.