Politiko etc!

Nagkainit na og maayo ang politika sa nasud karong nagsugod na ang pag-sumiter sa sertipiko de kandidatura sa mga lokal nga mga magpapili. Apan makakurat ang mga kabag-ohan sa mga partido, makapakuyaw ang kabag-ohan sa baruganan sa mga kandidato ug makapahugyaw ang mga bag-ong desisyon sa matag grupo. Ingon ini ka lingaw, mabulokon ug sa kanunay, kasamok ang dagan sa politika sa nasud. Ang angayang buhaton sa publiko mao ra gyud ang pagtutok ug pagsunod sa dagan sa politika aron kaulahian, matabangan sa kung unsa ang iyang mamahimong desisyon sa adlaw mismo sa eleksyon.

* Pormal nang gipaila sa One Cebu party ang ilang kompletong line-up sa unom ka mga distrito sa Sugbu. Adunay mga opisyal nga magpasubli sa posisyon, adunay mayor ug bise mayor nga nagbaylo sa pwesto, may amahan nga modagan pagka-mayor samtang ang iyang anak modagan sa ilang posisyon, may inahan nga mag-mayor ug may anak nga mag bise mayor, may kanhi magkaaway nga karon nagkahiusa na. Human mikalas sa grupo ang kanhi kaalyado ni Gobernador Garcia nga si Consolacion Mayor Avelino Gungob, dali nga nakakita ug ikahulip ang partido ni Garcia. Masaligon hinuon ang gobernador nga wala nay kausaban nga mahitabo sa ilang line-up. Apan sa klase sa politika ug politiko sa nasud, usahay dili ka makasiguro sa prinsipyo sa mga politiko.

* Makabungog ang suporta sa mga militanteng grupo ug sa mga kabus sa kandidatura ni kanhi gobernador Ting-ting dela Cerna pagka-kongresista sa ika-unom nga distrito sa Sugbu. Ingon og welga ang nahitabo sa buhatan sa Comelec dihang miduso sa iyang COC si dela Cerna nga gipatung-an sa mga tawo nga nagbitbit og placards. Gibutyag ni dela Cerna, wala siya’y kuwarta nga ipadagan sa iyang kampanya apan igo na ang tabang sa iyang taga suporta aron makasugakod ang iyang kandidatura. Ang pangutana, hangtud kanus-a molungtad ang suporta sa mga tawo sa kandidatong daan nang mipahibawo nga walay madawat nga ayuda gikan sa ilang gipaborang kandidato?

* Samtang nagkapupos ang adlaw sa pag-file og COC, naglibog pa ang oposisyon kinsay isakbang ni Governor Gwen Garcia. Apan matod ni kongresista Antonio Yapha, andam siyang mamahimong "sacrificial lamp" kung dili gyud modagan sa posisyon ang mga Osmeña ug Martinez. Nagpasabot ba nga ang pagtu’d-tu’d kinsay modagan sa posisyon sa pagka-gobernador sa kahuyang sa oposisyon nganong wala pa maka-kompleto sa ilang linya? O dili lang sila gustong isugal ang ilang panga’n tungod kay uban sa kahigayonan sa pagdaog mao usab ang posibilidad sa kapildihan? Pagkaubos sa pagtan-aw sa pamilyang Yapha sa ilang kaugalingon ug giisip nalang ang "3 termer" nga kongresista nga "sacrificial lamp" aron makompleto lang ang line-up.

* Magka-uyon man ang ilang mga programa ug tinguha alang sa Toledo City ug sa lalawigan sa Sugbu, apan wala gihapon motapon si Toledo City Mayor Arlene Zambo sa kampo ni Gobernador Garcia. Gipahimog-atan ni Zambo ang iyang prinsipyo ug baruganan nga magpabilin siya sa oposisyon hangtud nga maayo gihapon ang ilang relasyon. Gikombinsir siya sa One Cebu party nga motapon sa partido apan alang ni Zambo, dili pa karon ang tukmang panahon. Nagpasabot ba ni nga sa sunod nga katuigan ug sa mosunod nga piniliay hingpit na niyang talikdan ang oposisyon ug mabarog na sa administrasyon?

Apan unsa pa bay bag-o sa politika sa nasud gawas sa mga politiko nga nagbalhin-balhin og partido. Kung may mga politiko nga nihangop sa bag-o nilang kaalyado aduna say mga politiko nga nibasura sa ilang mga ka partido. Bisan asang anggulo tan-awon, mao ni nakalingaw sa politika sa Pilipinas. Apan kung imong palawman ang pagsabot sa maong punto, nagpakita lang ni sa gawi sa matag Pilipino.