Hala, file na mo!

Halos mag-abot sa Comelec karong buntag ang mga kandidato sa oposisyon ug administrasyon dinhi sa dakbayan sa ilang pagpasaka og certificates of candidacy.

Alegre g’yod unta kaayo kon mag-abot ang mga magkaatbang nga kandidato, apan dili kini mahitabo. Magligas ra hinoon sila og minutos kay alas 10 sa buntag ang pag-adto nila ni Jonathan Guardo sa Comelec.

Plano unta ni Mayor Tomas Osmeña nga alas 10 sab sila, apan pagkasayod niya nga mao usab kini ang oras nga ipasaka nila ni Guardo sa ilang mga certificates of candidacy, huwaton na lang nila nga mahuman sila.

Mentras anaa pa sa Comelec ang grupo nila ni Guardo, kinsa magpapili pagka kongresista sa south district, sila si Tommy ug mga kandidato sa administrasyon adto mag-standby sa City Council session hall.

Kon mahuman na sila si Guardo pag-file sa ilang certificates of candidacy, mobanos dayon sila si Tommy.

Wala na malilong sa publiko kon kinsa ang mga kandidato sa Bando Osmeña Pundok-Kauswagan, apan wala pay nasayod kinsa ang maglangkob sa mga kandidato sa oposisyon.

Akong lauman nga si kanhi Mayor Alvin Garcia mousab sa iyang huna-huna ug mohukom na nga molansar atbang ni Tommy. Tan-aw nako, si kanhi Mayor Alvin Garcia ra g’yod maoy lig-ong kandidato nga moatbang ni Mayor Osmeña.

Apan gitug-anan ko ni Guardo kagahapon nga si Lahug barangay captain Mary Ann delos Santos nakahukom na nga maoy moatbang ni Tommy sa pagka-mayor.

Si Mary Ann kuno maoy mopili kon kinsa ang iyang himuong bise mayor ug ang gipilian mao sila si Alvin ug ang anak niini nga si Raymund Garcia.

Uy, bag-o kini nga kalamboan. Tiaw mo kun matinuod, si Alvin magbise na lang ni Mary Ann?

Dili angay’ng matudloan si Alvin, apan bati tan-awon kon modawat siya nga mag-bise lang ni Mary Ann.

Tabla ra nga nahadlok siya ni Tommy ug maoy rason nga siya mag-bise na lang. Ayaw ana mayor Alvin uy, kon gusto ka, mayor g’yod ang imong daganan.

Usbon nako, gusto g’yod nako nga sa konseho, dunay modaug nga mga oposisyon. Kinahanglan nga dunay matawag og tinuoray nga piskalaysir sa grupo.

Dili malalis nga dunay mga konsehal nga sakop sa BOPK nga dili maayong sublian. Abi ninyo og ngano? Dili sila makamao sa trabaho pagka konsehal.

Aw, kon makiglantugi sila nako niini pananglit moinsister sila nga makamao, duola ra ko kay andam ko’g tagana nga mopasabot ninyo kun unsay trabaho sa konsehal.

* * *

Gisuportahan pag-ayo sa Region-7 Interagency Anti-Graft Coordinating Council ang lakang sa Ombudsman pag-imbistigar sa giingong "overpricing" sa pagpamalit og decorative lamppost.

Si Civil Service Commission regional director David Cabanag nga maoy chairman sa IAGCC-7 nagkanayon nga daku kaayo ang ilang pagsalig sa mga imbistigador sa Visayas Ombudsman.

Matud ni Cabanag nga kun tinuod man nga dunay overpricing pagpamalit og decorative lamppost nga gigamit atol sa 12th Asean Summit, angay g’yod kini nga sawayon sa katawhan.

Apan wala hinoon mohatag og komentaryo si Cabanag kon pabor ba siya sa awhag ni Tommy nga sila si Mandaue Mayor Thadeo Ouano ug LapuLapu Mayor Arturo Radaza suspensohon.

Nasinati kaayo ko sa kabuotan niining Atty. Cabanag kay nagkaila na kami niadto pang 1986, ug tan-aw nako takus siya nga mohimo og kampanya batok sa graft and corruption.