Pasaylo

Lab-as pa sa akong hunahuna ang proseso sa impeachment ni kanhi Presidente Joseph Estrada. Atol sa maong yugto sa kasaysayan sa Pilipinas, daghang mga senador ang nigawas nga bida ug ang uban nahimong kontrabida. Kinsay makalimot sa paghilak ni Loren Legarda, sa pagpatulo og luha ni Franklin Drilon, sa kamaayo sa mga argumento sa ubang mga senador ug sa pagpakahilom sa uban tungod kay walay nahibaw-an sa isyu o may marka nang daan ang ilang baruganan ug prinsipyo. Kinsay makalimot sa gitawag nga 'dancing queen' sa senado, si Tessie Aquino Oreta!

Ang pagkantyaw ni Oreta sa mga tawo kaniadto sulod sa senado, alang nako, mao na ang labing ubos, walay batasan ug walay respeto nga gibuhat sa usa ka senador. Ingon ug sa bata nga nakadaog sa duwang patentero, daw sa sugarol nga nakadaog sa sabong o sa usa ka inahan nga bag-o lang nahuman og labnot sa buhok ug sagpa sa aping sa iyang nakaaway nga silingan. Sukad niadto, dili na mapapas sa akong hunahuna unsa ang pwedeng mahimo sa usa ka edukadong tawo tungod ug alang sa iyang pagsuporta sa usa ka kwestyonableng presidente.

Human sa pipila ka tuig, buot magpapili pag-usab si 'dancing queen'. Iyang gibitbit ang saad nga mahatagan og libreng edukasyon ang mga bata sa pagtongtong pa lang sa unang ang-ang sa edukasyon. Saludo ko sa mga tawo nga nagpaluyo sa political ad ni Oreta tungod kay imong makita ang iyang pagkamatinud-anon sa iyang buot pagserbisyo pag-usab sa katawhan nga kaniadto iyang gibugalbugalan. Apan sa tinuod lang, akong nakalimtan ang iyang gihimong pagkantyaw sulod sa senado atol sa impeachment proceeding ni Erap sa matag higayon nga akong makita sa telebisyon ang iyang dagway.

Apan tungod kay nabutang sa walay kasigurohan ang iyang kadaugan base sa nanggawas nga resulta sa survey, gibag-o sa iyang mga political adviser ang iyang political advertisement. Karon, nangayo og pasaylo si Aquino-Oreta sa iyang nahimo kaniadtong pagbugalbugal. Ug sa pagtan-aw pa lang nako sa iyang nawong sa telebisyon, subling nahibalik sa akong panumduman ang unta nakalimtan na nakong senaryo sa senado. Subling nabuhi ang akong pagmahay sa usa ka babayeng senador sa iyang gibuhat. Ug wala kalikayi ang pagsulpot sa mga pangutana niining iyang bag-ong pakulo.

Kung dili pa ubos ang iyang posisyon sa mga ratings, mangayo kaha og pasaylo si Oreta? Nganong karon pa man siya nibayad og advertisement aron ipadangat sa katawhan ang iyang pagbasol? Kung matinud-anon pa si Oreta sa iyang gihimo, nganong wala man niya hatagi kaniadto og oras ang pagpangayo og pasaylo sa katawhan? Nganong karon pa man nga mas popular pa sa mga botante ang iyang pag-umangkon nga si Noynoy ug mas nisimpatiya pa ang katawhan kang Kris Aquino tungod sa iyang gipagawas nga mga pahayag.

Paspas kaayong nakahatag sa ilang pagdayeg ang mga senador nga kaniadto nikwestiyon sa kaligdong ni Oreta. Apan kinsa ba sila nga angayan nga mosaludo ni Oreta nga mismo sila aduna say mga bulilyaso sa ilang pagpadagan sa gobyerno ug mismo sila may kaugalingong pagpaka-uwaw nga gihimo sa publiko kansang suporta ilang giludhan aron lang maila. Kinsa ba sila nga mokwestyon sa sinsiridad ni Oreta nga mismo sila, makadaghan na usab nadudahan tungod sa ilang pagbalitok sa pikas grupo ug kapakyas sa pagtuman sa ilang mga saad ngadto sa katawhan.

Ang tinuoray nga makahatag og pasaylo kang Oreta, gawas sa kahitas-an, mao ang katawhan nga kaniadto, wala malingaw apan na-insulto sa iyang gihimong pagsayaw atubangan sa camera. Sa usa ka Kristyanong nasud, kansang mga tawo daling makapasaylo, angayan tan-awon ug hinuklogan nga ang pagpasaylo wala magpasabot nga kalimtan ang gihimo sa usa ka tawo. Apan usahay ang pagpasaylo nagpasabot nga imong patagamtamon ang usa ka tawo sa kasaypanan nga iyang gihimo aron siya makahinulsol. Sa susamang higayon, pwedeng kapanaminan sa uban nga una buhaton ang usa ka butang, kinahanglang tan-awon kung dili ba ni makadaot sa dungog nga dugay na nimong gi-ampingan.