Saavedra v. Fabmik

Wa mahinayon ang gikahinamang panag-abot nilang Crisologo Saavedra, ang nagbisto sa gidudahang overpricing sa surveillance cameras, decorative lamps ug street lamps nga gigamit sa 12th ASEAN Summit niadtong Enero, ug sa kadagkoan sa Fabmik Construction & Equipment Co., Inc., ang kontraktor sa labing mahalong mga suga nga nataod sa Dakbayan sa Mandaue. Nagkatinubagay na sa telepono silang Saavedra ug Atty. Romy Fuentes sa Fabmik sa Arangkada sa DYAB Abante Bisaya niadtong Huwebes ug nagkasabot nga mag-atubangay sa Kapamilya Media Forum gahapon. Apan nagkonsabo ang mosunod nga mga panghitabo pag-uswag sa kalihokan:

• Si Saavedra nitambong sa tigom sa Visayas Ombudsman ug nag-andam sa kasong plunder batok ni Lapu-Lapu City Mayor Arturo Radaza;

• Ang Fabmik nangayo og lugway pag-andam sa ilang mga dokumento; ug

• Ang SM City Entertainment Plaza gigamit sa gradwasyon.

* * *

Naapud-apod na gyod ang mga hinabang sa mga Sugbuanon nga natigom sa Kapamilya Relief Campaign sa DYAB Abante Bisaya ug ABS-CBN Cebu alang sa dul-an sa 2,000 ka libo ka mga pamilya nga biktima sa sunog sa mga barangay sa Mantuyong ug Guizo sa Mandaue City. Gidungan sab paghatag ang mga hinabang gikan sa ABS-CBN Foundation. Ang matag pamilya nga nasunogan nakadawat og labing menos unom ka kilong bugas humay, mga linata, noodles, asukar ug ubang pagkaon ug tagduha ka sako nga sinina ug ubang mga gamit sa panimay.

Hapsay ang pag-apud-apod, salamat sa bag-ong listahan sa mga biktima sa sunog nga gihimo sa social workers sa Bantay Bata 163 Cebu ug sa mga sakop sa Association of Concerned Texters (ACT). Nalista nang mga pamilya nga nipasangil nga giisnab sa Mandaue City Social Welfare Office kay gipasanginlang tua kapusta ni konsehal Jonas Cortes. Napapas sa lista ang mga dumadapig ni Mandaue City Mayor Teddy Ouano nga gikatahong gidoble paglista ug ang di mga biktima nga nakadawat sa nahaunang mga hinabang. Nakatampo sab pagbaraw sa mga lain og tuyo ang unipormadong mga sakop sa 701st Regional Command Defense Group sa Philippine Army reservists.

* * *

Hingpit sab ming magpasalamat sa tanang nanghatag og sinakong bugas, sardinas, corned beef, beef loaf, noodles, sabon, tambal, planggana, balde, galon, plato, baso, luwag, kaldero, kuwarta, sinina, sapatos, tsinelas ug ubang hinabang nga ilang gihatod sa mosunod nga drop-off points: South Bus Terminal, barangay halls sa Mabolo, Centro, Alang-Alang, Opao, Basak, pinuy-anan ni Atty. Bebs Almario sa Kinasang-an ug Canduman, Wow Travel & More sa E-Mall, Robinson's, Gaisano Mactan ug atbang sa Birhen sa Regla Parish.

Lain namong pasalamatan mao ang mga nakatabang sa paghakot sa nagbuntaog nga mga hinabang: Ang Gothong Southern Shipping Lines nga nagpaggamit sa ilang container vans, ang 6R Mercantile nga nagpagamit sa ilang 10-wheeler trucks, si kanhi Mandaue City councilor Tex Fortuna ug laing di magpailang magpapatigayon nga nagpahuwam sab sa ilang trak.

* * *

Email: [email protected]