Hala kahugaw diay!

Tukma g'yod diay ang kabalaka sa mga konsehal sa dakbayan kabahin sa pagkaon nga gibaligya niining mga "pungko-pungko vendors."

Dunay usa ka lumulopyo dinhi sa dakbayan nga mipahibalo sa kadagkoan sa City Hall kabahin sa binuang sa ubang mga "pungko-pungko" vendors nga ibalik-balik nila ang ginamit na nga suka.

Ingon niini ang ilang paagi. Matag customers hatagan nila og panaksan nga kabutangan sa suka, diin adto itunlod ang paliton nila nga sud-an. Tuslob sa suka, dayon paakon, unya tuslob na usab.

Sagad, daghan pang suka ang mahabilin gikan sa mga customers. Ang daginotan nga "pungko-pungko vendor" mosulod niini ngadto sa usa ka sudlanan aron motundag ang mga momho.

Kon daghan na ang mga suka nga matigum gikan sa mga subra, labi na'g gamay na lang sa orihinal nga sudlanan, isulod niya kini pagbalik atol nga walay magtan-aw. Tuod man, nakadaginot ang maong pungko-pungko vendor.

Hay, kalami sa ginamit nga suka nga sagol laway sa mga mikaon. He! He!

Wala makabantay ang naninda nga pagbuhat niya sa inantigo nga kalihukan, duna diay mga mata nga nagsud-ong kaniya. Dili lang nato itumbok kon asa kini dapit.

Unsa kahay mahimo sa mga tinugyanan sa City Health department niini?

* * *

Gipahibalo ko kagahapon ni Koronel Patrocinio Comendador sa malampuson nilang operasyon batok sa video karera diha sa barangay Suba-Pasil.

Resulta na kini sa reklamo sa taga Pasil nga miadto unta sa buhatan ni Konsehal Augustus Pe Jr., apan kay wala man ang konsehal adtong higayona, nahinabi ra kini sa mga sakop sa media.

Pagkasayod ni Comendador niini, iya dayong gimandoan ang iyang mga sakop og maong napahigayon ang operation. Matud ni Comendador nga gidiritso nila kini paghatud sa City Hall.

Wala hinoon makatug-an si Comendador kon pila ka video karera ang ilang nasakmit apan mipahibalo nga duna pay laing operation nga ilang ipahigayon diha sa maong dapit.

Nakaila ko ni Comendador nga motrabaho g'yod. Higala mi sukad nga captain pa ang iyang ranggo dihang nadistino siya sa Regional Special Action Force.

Si Konsehal Pe miawhag niadtong tawo nga makigkita unta kaniya nga mobalik sa iyang opisina aron makuhaan kini og dugang inpormasyon kabahin sa illegal nga kalihukan sa ilang dapit diha sa Suba-Pasil.

Bitaw, mas labing maayo nga mobalik kadtong maong tawo sa City Hall kay dihang nahinabi namo siya adtong miaging semana, may gidala pa siya nga mga sketch sa nahimutangan sa video karera.

* * *

Dunay tawo nga nadakpan sa pagkadena og bata didto sa Minglanilla, apan naunsa ba nga gibuhian man? Angay'ng manubag ang kapolisan sa Minglanilla kon nganong gibuhian nila ang maong tawo.

Bisan og ibutang nato nga nakahimo og salaod ang maong bata apan dakung sayop ang gihimo nga pagkadena sa bata. Kalapasan kini sa lagda nga gilatid sa Republic Act 7610.

Wala kaha'y kwarta nga naglambigit sa pagbuhi sa dinakpan? Angay'ng susihon kini ni Koronel Carmelo Valmoria, ang buotan nga provincial director sa kapolisan sa Sugbo.

* * *

Angay tuod nga ang mga manakop og laag nga mga iro nga mga sakop sa Department of Veterinary Medicine and Fisheries magsul-ob g'yod og uniporme ug mag-ID.

Kini kay dunay nakasaway nga ang mga kawani sa City Hall nga gitugyanan sa pagpanakop sa mga iro, daw sa "animal" pa nga sud-ongon kay usahay magsul-ob lang sila og mga lago kaayong sapot.