Nagpasabot nga kun naunsa kita karon, kini, gumikan kanimo. Kini maoy imong pagbuot. Ug kun unsa man ang dangatan ning atong nasud, ikaw gihapon ang magbuot. Ug tungod kay ang authority sa gobyerno, gikan man nimo, matuman gyud ang imong pagbuot, Dro. .
Sa laktod, anaa sa imong mga kamut, Dro, motuo kag dili, mosugot kag dili, ang kaugmaon sa atong nasud, wala kanilang atong giisip nga mga political leader. Kini tungod kay naghuwat lang sila sa imong pagbuot. Kay lagi ang ilang gahom nagagikan man kanimo, ug ikaw may nagbutang kanila sa ila karong gahom (gawas kon gipalit ka nila).
Mao kini ang essence sa demokrasya. Hari ang lungsod.
Karon, gihatagan na usab kitag laing higayon pag-exercise sa atong pagka-hari. Ug sama sa nangaging mga political exercises, ang resulta ning umaabot nga eleksiyon, kun giunsa nimo pag-exercise kining maong katungod, mao nay mahimong sukaranan ug sukdanan kun unsa nga matang sa ugma ang atong mapaabot.
Kun imo lang gihapong ibaligya ang imong katungod pagpili, sama sa imong gihimo sa nangaging mga eleksiyon, ayaw, pagpaabot og mahayag nga ugma. Kun mosugot ka nga tikason ug tikasan ka, ayaw pagdahom nga magmauswagon kining atong nasud.
Kon magpasagad kag botar, ug kun ibasi lang gihapon nimo ang pagpili sa popularity, ug dili sa katakos sa mga kandidato, ug kun imo lang gihapong iagad ang choice sa gidaghanon sa kwarta sa mga kandidato, o sa kanindot nilang mokanta ug mosayaw, nan, pamutos na lang, ug apas sa imong banay o kaparyentihan nga atua na karon didto gawas sa nasud nanginahubi.
Yes, lungsod, hinaut nga ang resulta sa atong pagpasagad sa nangaging mga eleksiyon, nakahatag kanatog igong leksiyon, ug nakapatagam kanato, nga ang atong pagpasagad mobalik ra usab kanato, suma pa sa giingon sa mga istambay nga, foolishness of the Filipino people, go home to the body.
Suma karon, kinsa may nag-antos? Dili sila, kon dili, kita. Kita, tungod mi-go home to our body ang atong mga foolishness sa nangaging mga eleksiyon. Wa gihapon ka motagam, Dro?