Tall, dark, and handsome

Nabantog si Charisse sa ilang dapit nga pilian og mga lalake. Ideal man niya ang tall, dark and handsome. Dugang pa, gusto sab niya ang lalake nga dunay wheels, ug jewels. Hinuon, dili man sab kabintahaan ang iyang dagway kay guwapa man sab siya nga pagkababaye. Matud pa sa uban: "Oozing with sex appeal." Daghan ang nihalad sa ilang gugma kaniya sa pamasin nga sila makadama. Usa na niini si Rex. Buotan, utokan, ug maampoon nga pagkatawo si Rex. Apan lagi, tungod kay kabus ra man ug working scholar ra man kuno mao nga wala gyud tawon makadama ang atong ulitawo. Hangtud nga miabot si Bogart sa maong tunghaan. Dili matawag og guwapo si Bogart apan sinaw lang kaayo ang wheels nga iyang gidala sa matag higayon nga duna siyay ihatud sa eskwelahan diin nagtungha si Charisse. May pagka-bilyako kini si Bogart. Ug kay dreamcar man ni Charisse ang SUV mao nga sa walay langay-langay gisugot dayon niya si Bogart. Approve without thinking. Ingon anang pulonga. Sa tanto nilang kuyog-kuyog, nadisgrasya gyud si Charisse. Ug gitakda dayon ang adlaw nga mamalaye na si Bogart.

Tuod man, miabot si Bogart sakay sa SUV kuyog ang usa ka hamtong nga lalake nga sa matataw kaayo nga usa kini ka executive. Sa dihang mipahimutang na ang tanan aron sa paghisgut-hisgut sa mga plano daw sa natuk-an si Charisse ug ang iyang mga ginikanan ning maong mga pulong gikan sa hamtong nga lalake: "Nang, Noy, pasensiya namo sa nahitabo. "Nia mi karon aron maoy mangama alang sa akong Driver nga buot mangasawa kang Inday Charisse nga inyong anak!" Daw sa natuk-an si Charisse. Dili siya makatuo. Dili gayud!

Pamalandong

Mga duha lang ka mga punto ang buot nakong ipaabot. Una, dili tanang mogilak, bulawan. Ikaduha, ayaw pagdali-dali og buhat og mga desisyon kay walay pagbasol nga mag-una.

* * *

E-mail: [email protected]