Jonkie ug Tommy

Nagpabiling kalma ug walay klarong kontra si Mayor Tomas Osmeña dinhi sa dakbayan, samtang diha sa Mandaue nagkadaghan ang supporters ni Jonkie Ouano sa iyang kandidatura pagka mayor.

Kini maoy akong panglantaw sa dagan sa politika dinhi sa dakbayan sa Sugbo ug diha sa silingan natong dakbayan sa Mandaue.

Sa Mandaue, daku kaayo ang epekto sa pag-abin na ni Joy Ouano sa iyang pag-umangkon. Kon midayon pa siya paglansar sa pagka mayor, daku ang epekto.

Kon dunay mga botante nga mosuwat ra og "Ouano" diha sa balota, sigurado nga mausik kay dili man iphon ang botos kay silang duha pulos man mga bag-o nga kandidato.

Apan karon, kadtong mga dumadapig ni Joy Ouano, siguradong adto na mosuporta ni Jonkie.

Unya, si Jonkie gisuportahan usab ni Kongresista Nerissa Soon-Ruiz nga duna usa'y mga dumadapig nga kon asa ang ilang lider, adto usab mosuporta.

Kadtong tulo ka kapitan sa barangay nga unang mipadayag og pag-alalay ni Jonas Cortes karon miback-out na sa ilang kandidatora pagka konsehal.

Sa ato pa, daw sa hayahay na ang ginhawa ni Jonkie. Sa ako nang giingon, daku ko'g pagtoo nga takus si Jonkie sa posisyon.

* * *

Sa bahin ni mayor Osmeña, klaro kaayo nga bisan og si Lahug barangay captain Maryann delos Santos molansar pa og moatbang pagka mayor, klaro gihapong pilde.

Aw suwayi ninyo, pustaan ta mo'g tinunga. He! He! He! Pilde man gani makaduha ka higayon si kanhi mayor Alvin Garcia nga duna nay mga tawo sa lainlaing barangay, si Kapitan delos Santos pa kaha.

Apan akong klarohon, midayeg ko ni Maryann nga makamao usab sa trabaho pagka mayor. Gidayeg gani nako siya sa hilom kay ang Lupong Tagapamayapa sa Lahug maoy outstanding Lupon sa tibuok nasud tungod sa maayo niyang pagdumala.

Lahi man god ang eleksyon. Kinahanglang duna kay tawo nga maglihok nang daan diha sa mga barangay. Ayaw ko'g ingna nga kadtong mga dumadapig ni Tommy kaniadto, mobali na ni Maryann?

May duha na ka tawo nga milansar pagka mayor sa dakbayan, apan pastilan, maayo na lang og makakuha og 1,000 ka botos. Ang usa dili g'yod gani mabotahan kay dili man maapil ang iyang ngalan sa lista sa mga kandidato kay dili man registered voter.

* * *

Angay g'yod nga daygon ang gihimo ni P02 Antonio Deen nga wala mag-usik og higayon, gipangpusil niya ang mga tulisan nga nanulis sa usa ka beauty parlor didto sa sitio Tigbaw, barangay Talamban kaniadtong miaging gabii.

Tan-awa, dili ba gawas nga makadawat siya og pasidungog, si P02 Deen hatagan pa g'yod og P50,000 nga financial assistance ni Mayor Osmeña.

Kamong ubang polis diha, pag-inabtik mo. Baya usab ning ubang bag-ong polis nga makit-an nakong magbarug-barog sa daplin sa karsada uy, bakikaw kaayo manglihok-lihok.

* * *

Kadtong tawo nga miadto sa buhatan ni Konsehal Augustus Pe Jr. sa City Hall sa miaging Lunes aron pagtug-an sa video karera operation sa Pasil ug Suba, giawhag ni Konsehal Pe nga pabalikon.

Wala g'yod diay sila magkita ug si Konsehal Pe kay atol nga niadtong higayona mitambong kini og tigum.

Apan bisan og wala pa makabalik ang maong tawo sa buhatan ni Konsehal Pe, si Koronel Patrocinio Comendador, ang direktor sa Cebu City police, mipasalig dayon sa paghimo'g aksyon sa reklamo.

Nahinabi man god sa mga sakop sa media ang maong taga Pasil nga mo-report na unta ni Konsehal Pe ug mitug-an nga rampant ang video karera operations sa maong dapit.