May sukaranan ang sugyot ni Cebu City Vice Mayor Michael Rama nga kinahanglang tukuron sa labing daling panahon ang tinuyong komisyon nga motutok sa pag-imbestigar sa nabistong dagkong anomaliya sa mga proyekto sa 12th Asean Summit nga gipahigayon dinhi sa Sugbu niadtong Enero. Nabalaka si Rama nga di matingob ang atensiyon sa Visayas Ombudsman tungod sa kadaghan sa ubang mga kasong pagpangawkaw nga ilang giatiman. Ug kon unahon sa Ombudsman ang mga kontrobersiya sa summit, di sab makiangayon alang sa mga hingtungdan sa ubang mas una apan mabiyaan nga mga kaso.
Si Rama nipasabot sa DYAB Abante Bisaya nga mahimong matukod ang komisyon pinaagi sa kamandoan sa Kongreso, nga imposibleng mahitabo kay namakasyon nang mga kongresista ug mga senador alang sa eleksiyon sa Mayo, o sa mas daling makab-ot nga kamandoan ni Pres. Arroyo, sama sa pagtukod sa Davide Commission niadto ug sa Melo Commission karong bag-o.
Apan si Pres. Arroyo gikahadlokang naglingiw-lingiw lang atubangan ning gidudahang usa sa labing dakong kawat sa atong panahon. Kapila na siya magbalik-balik dinhi sa Sugbu human niulbo ang nangalisbo nga multi-milyones pesos nga mga proyekto nga kusganon niyang gipanalipdan gikan sa nahaunang mga pagsaway sa pag-usik-usik, apan wa siya motingog bisan ek na lang. Sa iyang kamapagarbuhon sa kalamposan sa niaging summit, kahibudngan nganong wa manginlabot pagpasusi sa mga pasangil sa kahiwian nga kon mapamatud-an makabuling sa gipasigarbo niya pag-ayong kalihokan.
Kay dedma ra mang presidente, nitumaw ang kahadlok nga ang makalilisang nga pangurakot gihikay o labing menos gitugotan sa labing dagkong mga opisyal sa kagamhanan. Karong nabisto nang ilang binuang, kuyaw nga kutob ra ni sa pagsugod sa mga imbestigasyon ug sa ngadtu-ngadto, igo gyong mohupas nang pasiunang pag-ulbo sa mga magbubuhis nga nabag-ohan sa ingon ini kadako ug kapating nga pangawat, duphan ra gihapon ang tanang sad-an ug sama sa naandan wa lang gihapoy bisan usang mabalhog sa bilanggoan.
Sa di pa manulisok si Pres. Arroyo sa oposisyon ug sa media nga maoy hinungdan sa kauwawan nga naangkon sa Pilipinas dihang giila nga maoy labing kurakot nga nasud sa tibuok Asya, angay siyang pahinumdoman nga di ang oposisyon ni ang media maoy nangawat. Ug sa di pa siya manghambog nga nanggukod sa mga kawatan, angay'ng ipatin-aw una ang mosunod:
o Nganong 21 ka tuig na human napukan ang diktadura, wa pa may bisan usa sa mga kadugo ug kakonsabo ni Ferdinand Marcos nga nabilanggo?;
o Nganong 12 ka tuig human napasaka, nalansang pa man gihapon sa pre-trial ang binilyon ka pesos nga mga kasong tax evasion batok sa magpapatigayong si Lucio Tan?; ug
o Nganong unom ka tuig human napalayas sa Malakanyang ug nabalhog sa bilanggoan, nagpabilin mang mas hanap kay sa diyes panas ang dagan sa husay sa kasong plunder batok ni Joseph Estrada?
Email: leo_lastimosa@abs-cbn.com