Election fever

Way lalis, eleksyon na sa Pilipinas. Karon palang, nanggawas na ang mga timailhan sa labing gisaw-an ug gihisgutan nga kalihukan sa nasud. Karon palang, nagsugod na ang kagubot ug kisaw sa mga politiko ug ilang mga batos. May mga kanhi kaaway sa politika nga karon su'od pa sa managsuon ang panag-uban ug may mga managsuon o pamilya nga nisunog sa ilang maayong relasyon tungod ug alang sa politika. Apan unsa ba ang mga timailhan sa eleksyon sa nasud ni Mr. Juan dela Cruz?

* Una, makita sa telebisyon ug madungog sa radyo ang baduy nga mga campaign ads sa mga politiko nga gihimo ang tanan, lakip na ang mamahimong kataw-anan, tungod ug alang sa pagbitik sa boto sa katawhan. Luyo sa ilang mga political ad mao ang kamatuoran nga nigasto sila og minilyon ka pesos aron lang pagpagawas sa ilang pagarpar. Kutob lang sa pagduda ang publiko unsaon pagbawi ang maong gasto human sa eleksyon. Samtang ang Comelec padayong nipahinumdum sa "fair elections act".

* Ikaduha, ang pagbida sa mga artista ug mga popular nga mga tawo sa natad sa politika. Bisan kung nahibawo unsa ra ka gamay ang iyang hibawo sa pagpanday og balaod, gipugos gyud sa mga sama ni Manny Pacquiao ang mosu'd sa ring sa politika aron makig boksing sa kongreso. Si Angelica Jones, magpapili pagka-bokal sa iyang probinsya ug si Lito Lapid modagan pagkamayor sa Makati?

* Ikatulo, ang pagsunog sa maayong relasyon sa pamilya aron lang mapadayon ang tinguha nga modagan sa posisyon nga dugay na niyang gipangandoy. Ang nahitabo sa Batangas tali ni Vilma Santos-Recto ug sa igsuon sa iyang bana nga si Ricky Recto maoy usa lang sa ordinaryong sitwasyon sa politika sa nasud. Gani, mao usab ni ang posibleng mahitabo sa lungsod sa Guihulngan, Negros Oriental kung diin ang asawa ni kongresista Jing Paras magpapili sa kongreso batok sa igsuon ra sab ni Paras.

* Ang pagpanggawas sa mga baho ug isyu sama sa nahitabo karon kang First Gentleman Mike Arroyo nga gipistahan ang mga litrato sa internet kuyog ang usa ka babaye nga giingong iyang kabit. Gisaw-an ang maong tsismis nga daw karon palang nigawas ang balita nga aslum na ang relasyon sa "first couple." Wala pa ta mahibawo kung unsa ang epekto ini sa mga kandidato sa administrasyon. Kung buot sumadahon, daghan nag paka-uwaw nga gihimo si FG sa administrasyon sa iyang kapikas.

* Ang pangangkon sa mga taga oposisyon nga gitanyagan sila og minilyon ka pesos sa grupo sa administrasyon aron modagan pabor sa ilaha. Giingong usa sa mga nakabenipisyo si Cesar Montano nga matud pa, gisaaran nga bayran og P200M aron lang modagan ubos sa grupo ni Presidente Arroyo. Dali usab dayon nga nakapangangkon ang mga taga oposisyon nga gihaylo usab sila og kuwarta aron mopabor sa grupo sa administrasyon.

* Ang pagpanggawas sa mga survey nga usahay makatuo ka ug usahay dili. Adunay mga politiko nga gidawat ang resulta sa survey ug giisip nga hagit sa ilang kugi sa kampanya. Adunay uban nga gibaliwa ang nanggawas nga resulta sa survey samtang ang uban dili makadawat tungod kay minilyon ka pesos na ang ilang nagasto sulod sa usa ka buwan palang sa kampanya. Sa sunod nga mga adlaw, manggawas usab ang uban pang survey groups ug mopagawas og resulta sa pabor sa nangiwit nga mga kandidato.

* May mga magpapili sa lokal nga posisyon nga mihimo na og gimik, mosakay sa isyu ug magpatuo nga kinasing-kasing ang ilang pagtabang sa mga tawo nga nabiktima sa trahedya. Maglibog ka kung kinsa kanila ang seryoso ug kinsa ang nagpakaaron ingnon lang. Human sa eleksyon, ambot lang kung makahibawo pa ba kahang motabang ang maong mga tawo.