Maayo untag isunod ni Tomas ang Carbon ug Taboan. Dihay mga effort ni Mayor Solon paglinis ug pagpaanindot sa Carbon market, apan pagka-wa niya, mibalik ang kahugaw ug ka-himi, to think nga naa diha gikan ang atong pagkaon.
Ang Ramos supermarket, kon hinumduman, usa sa mga dagkung proyekto ni Serging. Sa akong hinumduman, iyang laraw ang pagbutang diha sa north bus terminal, apan, gumikan sa ka-higpit sa lugar, gihimo na lang gyud nga supermarket.
Laing mga dagkung proyekto ni Serging mao ang pagbalhin sa airport gikan sa Lahug ngadto sa Opon, ug pagtukod og taytayan pagkutay sa isla sa Mactan ug sa mainland Cebu.
Sa ako nang nahisgutan dinhi, ang maong laraw, alang kanamong mga bata (7 years old pa tingali ko adtong panahona), usa lamang ka damgo. Apan, karon, usa na ka reality, ug laing Osmeña ang nakapatukod og laing bridge.
Laraw usab ni Serging ang pag-semento sa kadalanan sa tibuok lalawigan, on a turn-key basis, apan, wa mosugot ang national government niini, ambut ngano. Ingonman, kon hinumduman, laraw usab ni Serging nga himoong free port, usa ka laing Hongkong ang Opon, inigbawi na sa China sa Hongkong gikan sa Britanya. (Ingon adto ka advanced ang panlantaw ni Serging, 50 years ahead).
Ug karon, atong malantaw ang kalipay ni Serging sa pagpaanindot sa iyang Ramos Supermarket, gihimo sa mismo niyang anak.
Yes, Dro, ang nahitabo karon sa Ramos supermarket, nakapahinumdom kanato ni Serging. Manghinaut kita nga kinsa man ang mag-maintain niini, lakip na sa mga tenants, unta, ilang ipabilin ang kalinis ug katahom, di lang sa palibot kondili, ug ilabina, sa sulod niini.
Nganong di man nato mahisama ang Ramos supermarket sa mga mall sa SM ug Ayala, among other modern malls in Cebu? Imposible ba ni? Usa ni ka dakung hagit si kinsa man ang mahimong market superintendent sa Ramos supermarket..
Mahimo kaha ni nato, Dro?