Reklamo sa trabahante

Daghan kaayo ang atong kaigsuonan nga gilupigan sa ilang mga employer sa ilang pagpanarbaho. Ugaling lang kay wala silay igong katakos ug kaisog sa pagpanalipod sa ilang katungod ngalan nga trabahante. Kini ang hinungdan nga daghan usab ang mga employer nga mag-abuso sa ilang mga trabahador.

Dugtong niini, nakadawat kog text nga nagkanayon: 'Good day. Usa ko ka trabahante sa general services (ngalan gipugngan). Dugay ra mi diri. Wala silay pay slip nga ihatag. Wala mi number ug ID sa PhilHealth ug Pag-Ibig. Kon mangayo mig pay slip dili sila mohatag. Naa sad sa HR nila puwerting malditaha. Pilion lang kun kinsa ang iyang tagdon. Makaduol ba ko sa DOLE if ever mopahawa na ko sa agency? Thank you." -- 0918-415873x (Jan. 23, 2007 -- 15:02:41)

Mahimo kang modangop sa NLRC kon gusto ka gyud nga panalipdan ang imong katungod isip usa ka trabahante. Sutaa una nga balido ang mga rason nga imong ipresentar sa maong buhatan aron mahatagan kag pagtagad. Kanang makapakombinser nila nga gitikasan ka gyud sa imong employer ug makita nila nga angay ka gyung tabangan.

Bahin nianang pay slip, daghan gyud ang mga trabahante nga nagmulo tungod kay ang kompaniya nga ilang gitrabahoan dili moisyu og pay slip. Dili nila makuwenta kun pila ang ilang suweldo ug kon gikuhaan ba kinig deduction alang sa PhilHealth, Pag-Ibig, SSS ug unsa pa dihang uban. Sa imong bahin, angay mong tinuon kon ang imong suweldo nakuhaan ba og deduction alang sa PhilHealth, SSS ug Pag-Ibig. Kun nakaseguro kang gikaltasan ang imong suweldo, tukia kun nganong wala mo hatagig card o ID. Imong katungod ang paghikutar niana. Alkanse ka kun gikaltasan ang imong suweldo alang sa bisan unsang kontribusyon apan wala kini i-remit sa imong employer. Busa lihok dayon aron masayran mo ang matuod.

* * *

Ubay-ubay gyud ang mga PUJ driver nga mipadangat kanakog reklamo batok nianang dispatser diha sa Colon, dapit sa eskina Leon Kilat. Bagis kuno kaayo. Nganong gipasagdan man lang kana sa mga enforcer bisan dayag kaayo ang iyang extortion activities?

* * *

(Sumbong ug reklamo? Text sa 0910-8105522)