Wanted: Kurakot!

Makalilisang ang bag-ong presyo sa decolamp sa dakbayan sa Mandaue. Nagtuo ko nga ang kapin nubenta mil pesos nga nigawas nga presyo kaniadto, mao na ang labing mahal nga presyo sa matag decorative lamp post. Makapahibulong nganong niabot sa kapin dos sientos mil pesos ang matag decolamp sa Mandaue. Tungod sa bag-ong gibutyag nga kasayuran sa DPWH, ang maong mga suga na siguro ang labing mahal sa tibuok kalibutan.

Aron sa paghatag og igong impormasyon sa katawhan, tuyo nakong gisusi pila ang presyo sa mga decolamp nga gigamit sa ubang lokal nga kagamhanan sa nasud aron sa mas malinawon ang publiko unsa ka mahal ang mga decolamp sa Mandaue. Nagsugod ang tinguha sa mga LGU's sa pagbutang sa nindot nga mga suga dihang unang nagtaod og nagpakita sa kanindot ini ang dakbayan sa Maynila.

Ang mga "decorative lamp post" ang naghatag og dugang kolor ug atraksyon sa sikat nga "baywalk" sa Roxas boulevard. Matod sa mga taga engineering office sa Manila, dili momenos sa dos sientos mil pesos ang kantidad sa matag decolamp. Kombinsido ko sa presyo tungod sa ka high-tech sa mga suga ug sa daghang kolor nga nagpalibot sa matag poste. Mas lig-on ug de kalidad usab ang maong mga decolamp. Apan ang decolamp sa dakbayan sa Mandaue, dili katuhuang moabot og kapin dos sientos mil pesos matag usa.

Susamang decolamp ang gipataod sa lokal nga kagamhanan sa Naga, habagatang Sugbu aron panindoton ang plaza ug munisipyo sa lungsod. Ang susamang decolamp sa Mandaue, napalit lang sa Naga sa kantidad nga dise says mil pesos matag usa. Igo lang sa pagkatawa si Mayor Valdemar Chiong sa Naga sa taga liog nga presyo sa mga suga sa Mandaue. Nigasto lang og kapin dos milyones pesos ang Naga sa pagpamalit sa maong mga suga. Apan ang mga suga sa ASEAN summit, kahibulongang niabot og minilyon ka pesos ang kantidad.

Apan mas lawom pang isyu ang nagpaabot sa decolamp. Katunga palang sa tinguhang makab-ot ang kamatuoran ang pagkabutyag sa mga dokumentong nagpamatuod nga may "overpricing" nga nahitabo sa kontrobersyal nga suga nga gipangtaod sa rota sa ASEAN summit. Ang laing dakong hagit mao ang pagsusi kinsa ang mga tawo nga nakabenipisyo sa minilyon ka pesos nga salapi gikan sa maong mga proyekto. Maisip nga walay puangod ug walay uwaw ang mga tawo nga nikawkaw sa salapi sa katawhan aron pagpaburot sa ilang mga bulsa.

Ang labing dakong hagit karon mao ang padayong pagsusi kinsa ang mga personalidad nga nagpaluyo pagpaburot sa presyo ug pagpalusot sa mga dokumento aron ma-aprobahan ang makalilisang nga presyo sa maong mga decolamp. Kung unsa ka saba si Mayor Tomas Osmeña sa dakbayan sa Sugbu paglimpyo sa iyang panga'an ug sa iyang kagamhanan sa kontrobersyal nga suga, makabungol nga kahilom ang nahitabo sa dakbayan sa Mandaue ug LapuLapu ug nagpaabot pa'g pipila ka adlaw una mitingog aron sa paglimpyo sa ilang dungog.

Tungod sa kontrobersiyal nga suga, pwede nang masu'd sa "world record" ang Sugbu isip may labing mahal nga suga sa tibuok kalibutan. Ang mga proyekto sa summit mao ang nakaingon nganong wala pa hingpit matapos ang summit tungod kay hangtud karon, padayon pang gisaw-an sa katilingban ang mga isyu nga may kalambigitan sa maong tigum. Kung pahiyom ang gibawos sa mga delegado tungod sa kalipay sa mainitong pag-abi-abi kanila su'd sa lima ka adlaw dinhi Sugbu, ang mga Sugbuanon nakapangawot sa dili katol tungod sa mga isyung nahibilin human sa maong tigum.

Dili pa maisip nga hingpit nga nagmalampuson ang summit hangtud nga dili mahatagan og hustisya ang minilyong kantidad nga mga suga nga gipangtaod sa kadalanan ug uban pang proyekto alang sa labing dakong tigum nga gipahigayon dinhi. Samtang padayon ang pagtuki sa maong kontrobersiya, angayang tan-awon, pangitaon ug silotan ang mga tawo nga nakabenipisyo sa maong proyekto. Gipangita karon ang mga kurakot pipila ka buwan sa dili pa ang eleksyon.