Matud pa sa usa ka Amerikanong political Scientist nga samtang magpabilin pang gikinahanglan ang piniliay, ang partidong politikal gikinahanglan pa gihapon kini tungod kay mao lamang kini ang kahugpungan nga makapadaug og kandidato.
Ang partidong politikal giumol sa mga tawo nga gusto og kausaban sa mga patakaran nga gipatuman sa kagamhanan ug sa mga tawo nga gustong ipabilin ug ipadayon ang mga patakaran nga gipatuman sa kagamhanan. Apan subo kaayo nga palandungon nga ang politikanhong kultura sa katawhang Pilipinhon nakamugna sa mga partidong politikal sa paghimo og hukom sa piniliay nga wa ibasi sa isyu ug plata porma de pang gobyerno kon dili gibasi kini sa personalidad sa usa ka kandidato ug sa ilang performance sa entablado.
Mao kini ang hinungdan kon nganong adunay mga miyembro sa usa ka partido nga atoa malinya sa pikas nga mga partido. Tan-awa ang Nationalist Peoples Coalition ( NPC ) ni Danding Cojuangco. Si Francis Escudero, Tito Sotto, Tesie Aquino Oreta nga pulos mga sakop sa NPC atoa malinya sa managlahing partido. Si Francis Escudero sa Genuine Opposition samtang si Sotto ug Oreta sa Team Unity ni Gloria. Tan-awa usab ninyo ang partidong Liberal. Ang Drilon faction nalinya sa opposition samtang ang Lito Atienza wing atoa usab sa Unity team. Aduna pa usay ubang partido nga ang ilang mga sakop milinya gihapon sa opposition ug administrasyon.
Tungod niini, atong nabatyagan nga sa matag pamulong sa mga kandidatong nahisakop sa managlahing partido pero nagpalinya sa usa ka dominanting partido maghisgot og managlahing baruganan sa mga isyu nga ilang gihisgutan. Wa sila makahuna-huna nga ang prinsipyo nga ilang gibarugan dili mahatagan og katumanan kon mag -inusara lamang sila tungod kay nanginahanglan kini og suporta sa uban niyang ka partido.
Usa kini sa mga rason nga makaingon kita nga hinay-hinay nang nalusno ang partidong politikal dinhi sa nasud, tungod kay dili na prinsipyo sa partido ang giduso sa mga kandidato kon dili ang ila nang kaugalingong tumong.