Sumad sa paningil

Guinsaugon, St. Bernard, Southern Leyte -Sa pagtimaan sa unang sumad sa bangis nga katalagman, ang mga biktima padayong nangita sa mga hinabang alang nila. Ilang gipasanginlan si Gobernador Rosette Lerias sa Southern Leyte nga maoy nihikaw sa mga hinabang ug si Mayor Maria Lim sa St. Bernard nga nangiyugpos lang sa gihimo ni Lerias. Gisaway nilang lusot ni Lerias nga giapud-apod niyang mga hinabang sa ubang mga biktima sa katalagman sa lalawigan bisan sa giingong pahibawo sa mga tinubdan nga alang nila ang mga hinabang.

Wa hinuon mag-inusara si Lerias. Si Lito Baylan, presidente sa New Guinsaugon Subdivision Homeowners Association, nisumbong sa DYAB Abante Bisaya nga niliwat sang Lerias ang usa ka kura paruko. Kinsa nagdumili paghatag sa donasyon gikan sa Estados Unidos bisan gipasabot na sa donors nga ang hinabang gipaagi lang sa bank account sa parokya tungod sa ilang kahadlok nga hilabtan sa mga politiko apan alang gyod sa Guinsaugon.

* * *

Bisan sa katalagman, o tungod ba kaha ini, gitusak ni kupido ang mga kasingkasing sa mga biktima nga nailo sa ilang mga kapamilya. Sa niaging Valentine's Day, upat ka paresan sa mga molupyo sa napapas nang barangay ang nagpakasal. Ang tulo ka paresan pulos mga biyudo ug mga biyuda nga nagkasabot nga hiusahon ang mga nahibilin sa ilang mga pamilya aron pagsugod og bag-ong kinabuhi.

Laing naigo ni kupido mao ang bag-ong barangay kapitan sa Guinsaugon. Si Eglecerio Coquilla maoy numero unong konsehal nga napugos pag-asumir pagka kapitan dihang naapil sa gatosan nga natabonan sa nahulpa nga bahin sa bukid sa Kan-abag ang kapitan nga si Absalon Libaton. Unya sa Pebrero 28, si Coquilla, 62, kansang asawa ug duha sa siyam ka anak nakalas sa katalagman, magminyo ni Rosario, 48, nga namatyan sab og bana ug usa sa upat niya ka anak.

* * *

Makapatandog sa balatian ang mga pangaliya sa mga Sugbuanon nga nahipos sa DYAB Abante Bisaya pag-unong sa mga biktima sa katalagman. Ang labing makahuloganon mao ang yanong mga pangaliya nga gisuwat sa mga tinun-an sa Grade 3 sa Cebu Institute of Technology (CIT). Akong gida ang pasiunang mga pangaliya sakay sa Sky Patrol ug gipabasa sa pipila sa mga biktima. Ang ikaduhang hugpong sa mga pangaliya gida sa mga biktima nga nia magtungha sa Sugbu kinsa namauli sa Guinsaugon pagtambong sa sumad sa katalagman.

Ang Ramon Aboitiz Foundation Inc. (RAFI), nga maoy nagduma sa kuwarta nga nahipos sa KBP, ABS-CBN ug ubang kahugpongan alang sa scholarship sa mga ilo sa Guinsaugon malipayong nitaho nga nakapasar ang tanang mga tinun-an bisan sa nahiagomang trahedya. Ang di maayong balita mao nga dunay mga institusyon nga wa motuman sa ilang gisaad nga hinabang ug busa nagkinahanglan ang RAFI og labing menos P200,000 aron makatiwas ang mga tinun-an sa ilang mga kurso hangtod sa 2014.

* * *

Email: [email protected]