SOP o Standard Operating Procedure

SOP kon Standard Operating Procedure ang termino nga gigamit sa tres porsyento nga giingong gipangayo sa usa ka mayor gikan sa usa ka kontraktor aron padag-on sa kontrata paghimo og mga proyekto.

Nahimo karong pagya kining maong termino sunod usab sa mitumaw nga kontrobersya nga naglambigit sa usa ka mayor, usa ka kontraktor, ug usa ka negosyante. Sama kaniadtong nag impeachment trial pa si Presidente Erap, nahimo usab nga pagya ang mga terminong "immaterial" ug "irrelevant".

Apan ang buot untang ipasabot sa SOP mao ang mga proseso o kondisyones sa usa ka kontrata o kalihukan sumala sa naandan. Buot untang ipasabot niini nga bisan wala nahilatid ang proseso diha sa usa ka kontrata o kalihukan, kini pagatumanon kay mao man ang naandan.

Ug naunsa mang pagka- unsaa nga ang SOP gigamit na man karong termino nga magpasabot nga kickback? Naandan naba diay nato ang korupsyon? Mao naba gyud diay kini ang atong kultura isip mga Pilipino? Pagka-baga ba gyud diay og mga nawong niining atong mga opisyales nga nagdawatan niining maong SOP? Pagka-pait baya ang kahimtang niadtong mga opisyales nga wala magpa-anad sa maong klaseng SOP kay dudahan man hinoon. Ug pagka-makalolouy diay sa sama kanatong ordinaryong tawo nga dagko kaayog kaltas sa atong sweldo aron ibayad isip buhis. Kon ang kickback usa ka Standard Operating Procedure, buot ipasabot nga ang korupsyon diay Standard Operating Procedure na. Kon mao kana, asa na man lang intawon ta punita pipila ka tuig karon?

Daghang mga hungihong mahitungod niining pagpangayog SOP. Apan tungod lagi kay ang mga negosyante dili gustong madaot o masamok sa ilang negosyo, wala gyuy mo-angal. Mao usab ang mga kontraktor, labi kay sad-an sab sila kon mohatag silag SOP. Samot na nga dili motyabaw ang mga politiko, kay basig mao puy ilang binuhatan. Makadungog bitaw kitag mga politiko nga adunay mga helicopter, mga eroplano, apan wala may klarong negosyo, ug dili man unta dato ug gigikanan. Morag mga pinalit gikan sa SOP.

Niining maong pagtumaw sa maong isyu, manghinaut kita nga dili na ta magpa-dingol-dingol. Atong tukion pag-ayo ang mga butang nga atong makita apan dili gustong masabtan, sama sa: Nganong mahal ang lampposts sa ASEAN Summit ? Nganong madalig kadaot ang atong aspalto? Dili ba kini sila makamaong mohimog dalan, o nagdaginot ba hinoon? Nganong himoong adopted son ang mga negosyante ug dili kadtong mga mitabang sa mga tawo ug nagpakabana? Nganong daghag kwarta ang politiko kon makalingkod na sa pwesto? Ug ngano nga kon mahuman na ang ilang termino, ang ilang mga anak ug asawa nga bisan way kamahoan mao man gyuy papulihon nila nga gamay ra mag sweldo sa gobyerno apan dakog gasto?

Alang sa inyong mga panahom ug reaksyon, palihug e-mail sa [email protected] o text sa 0915-5536986. Daghang salamat.