Pagka abusado g'yod

Uy, maayong badlongon ni senador Manny Villar ang iyang mga tawo dinhi sa Sugbo kay mao kini ang unang milapas sa lagda nga dili magpataka og butang sa ilang mga campaign posters.

Dunay mga dapit nga gitudlo ang Comelec nga common posters area, apan ang mga tawo ni Villar, pataka lang og butang sa ilang mga campaign posters. Pagka abusado!

* * *

Angay nga tan-awon sa kadagkoan sa Globe Telecom nganong mibalik na man usab kining pagpadala og mga "unwanted text promo" ngadto sa mga subscribers.

Ambot og sa ila ba kini gikan kay ang sender, HSBC man. Ang HSBC nagkahulogan nga Hongkong Shanghai Banking Corporation.

Sa akong pagtimbang-timbang, duna gihapo'y kalabotan ang Globe Telecom mahitungod niini kay anha man moagi sa ilang network ang mga "unwanted texts."

Duna baya'y kamandoan niana ang National Telecommunications Commission nga nagdili na sa mga unwanted text promotions.

Kon hangtud karong adlawa makadawat gani gihapon ko og mga unwanted text promos, pahibaw-on na nako si NTC-7 regional director Danny Sy.

Samok kaayo, gibutang pa nga (If you don't wish to receive messages from HSBC, type HSBC OFF and send to 2327 for Globe and 09178902327 for Sun subscribers."

Kadaghan na ko mo-reply og "HSBC OFF" apan nagpadayon gihapon ang pagpadala og mga unwanted promos, pwerteng samoka.

Mga higala man nako ang mga opisyal sa Globe, apan dili ko magpanuko pagsaway ingon man pagreklamo kon dili mahunong kining maong binuang.

Sayod ko nga wala ako mag-inusara niining maong reklamo.

* * *

Bilib kong konsehal Arsenio Pacaña kay buot niya nga apilon g'yod ang mga sakyanan sa kagamhanan sa kampanya batok sa smoke belching.

Bitaw, pwerteng daghana nga mga sakyanan sa kagamhanan nga magbuga usab og itom nga aso ug angay kini nga ilakip g'yod sa kampanya.

Duna g'yod koy masundan nga sakyanan, labi na og magtungas paingon sa Lahug nga magsubay sa Gorordo Avenue, pwerteng asoha g'yod nga itum kaayo.

Sagad sa mga itum kaayo og aso mao ang mga trak de karga, mga bus ug mga PUJ.

* * *

Dili ko motoo sa mga intriga nga taktakon si Konsehal Pacaña sa Bando Osmeña Pundok-Kauswagan.

Dunay nagtoo nga intriga ra kini sa mga tawo nga pirming mohung-hong ni Mayor Tomas Osmeña.

Bisan og wala pa ipahibalo sa BOPK kon kinsa ang ilang line-up sa south district, apan daku ang akong panglantaw nga ang mosulod nga bag-ong kandidato mao sila si Jingjing Faelnar ug Cathy Yso.

Unang rason, si Faelnar kapitan sa Guadalupe nga anaa magpuyo si Mayor Tommy ingon man "buddy" silang duha.

Si Cathy, suod kaayo ni Tommy kay nahimo niya kining private secretary sa taud-taud nga panahon, mao man gani'y hinungdan nga gitudlo niya kini nga department head sa City Hall.

Si Cathy hinoon maayo g'yod nga himuong konsehal kay mapahiubsanon ug dili hambugera, unya motrabaho g'yod.

Ang uban diha kang kansang mga ngalan mitumaw na sa media, kuwang pa sa tahud kon sa mga manok-hiniktan pa nga termino.

Sa north district, ambot og kinsa kaha ang ihulip nila sa pwesto nga mabakante kay adto na man sa Talisay si Konsehal Leyson magpapili pagka mayor.

Dunay tabi-tabi nga si Art Barrit nga kanhi consultant ni Tommy ug maoy iyang chief propagandist sa miaging eleksyon, nagtinguha nga molansar.

Maayo usab kay si Art maantigo og sigurado ko nga dili siya maghilom-hilom kon mahimo nang konsehal.