Politika ug basura

Hangtud sa pagka karon, wala pay mipadayag og tinguha nga moatbang ni Mayor Tomas Osmeña sa eleksyon karong Mayo, apan duna nay mga pagduda nga usa niini mao si Sir Dodong Gullas.

Diha hinoong nagkahinabi kami si Sir Dodong, mapanagan-on siya nga mikonpirmar sa report nga nagtinguha siya paglansar sa pagka mayor dinhi sa dakbayan.

Ang pagduda gud nga si Sir Dodong molansar dinhi sa dakbayan mao man ang iyang pagbalhin og parehistro isip botante na dinhi sa dakbayan, gikan didto sa unang distrito sa Sugbo.

Si Sir Dodong, nga maoy Chairman of the Board sa Freeman, gilantaw sa uban nga higpit g'yod nga karibal ni Osmeña sa eleksyon.

Apan dunay uban nga mitambag nga mas maayo tingali nga si Sir Dodong unya na lang molansar pagka mayor sunod eleksyon og hatagan si Osmeña og higayon nga nakasilbi sa katapusang termino.

Si Sir Dodong g'yod hinoon, matinabangon g'yod sa mga kabus ug dili malimot sa iyang mga saad.

Gani bisan dili na siya kongresista, gibisitahan gihapon niya kadtong mga barangay nga gihatagan niya og mga proyekto.

Si Osmeña usa usab ka maayong lider kay dili mahadlok nga mopatuman sa balaod. Hinoon, duna pa lang g''oy kuwang, sama sa paglimpyo sa mga daplin sa karsada sa mga "obstacles."

* * *

Sa Mandaue, may partner na g'yod si Jonkie Ouano sa paglansar niya pagka mayor. Gipili niya si Konsehal Carlo Pontico Fortuna nga maoy iyang bisi.

Maayo kaayong pagkaparis kay mga batan-on ug agresibo sa gimbuhaton. Kon botante pa ko diha sa Mandaue, maoy botahan nako sila si Jonkie ug Carlo kay sa ilang mga kaatbang.

Buyno, dunay mga pagduda nga ang ubang mga kandidato nga sila si Jonas Cortes ug Amadeo Seno, gipaluyohan sa mga Quisumbing nga higpit nga karibal sa mga Ouano.

Buyno, dili g'yod malikayan nga moturok sa atong kaisipan ang pagduda kay may kasilo man g'yod ang mga Quisumbing ngadto sa mga Ouano.

Ang ako lang tambag mao nga ayoha lang ninyo sa pagpangampanya, unya mas labing maayo nga human sa eleksyon mawagtang na ang pangangkon sa mga mapilde nga sila gitikasan.

* * *

Unsa may nahitabo ni Koronel Cesar Enriquez, ang gitudlo nga hulip ni Jojo dela Victoria sa pagpangulo sa Bantay Dagat?

Gikan sa pagtudlo ni mayor Osmeña kang Enriquez nga mamahimong puli ni Dela Victoria pagka Bantay Dagat project director, wala gayod ko makamatngon og bisan gamay'ng kalampusan sa Bantay Dagat.

Ambot, kamo diha, nakabantay mo?

Kon ingon niini ang magpirmi, tukma ba kaha ko nga moingon nga usik lang ang kwarta sa dakbayan nga gihatag isip honorarium ngadto ni Enriquez.

* * *

Hugawa sa among barangay Lorega-San Miguel uy. Mga duha na ka adlaw nga walay hakot-hakot sa among mga basura, unsaon naguba ang garbage truck sa barangay.

Ang mga basura nga gipanglabay ra sa mga lumulopyo, anaa magpundok kilid sa barangay hall ug atubangan sa pultahan sa karaang ihawan.

Wala ko masayod kon ang opisyal sa barangay nanawag ba kaha og tabang gikan sa Department of Public Services aron masulbad ang maong problema.

Siyaro og wala g'yoy sulbad niining maong problema ang mga opisyal sa barangay. Pero ako na lay mauwaw nga magtan-aw sa nagliundok nga basura daplin sa karsada.

Paita, naa ra bay mga kan-anan sa duol niini. Unsa may inyong gihimo ani Capt?, Konsehal?