Urom ni Glo

Sayon ra alang sa Department of Health (DOH) ang pagbasol sa lokal nga mga opisyal sa Loon ug sa Bohol sa kapakyas pagpahibawo dayon nila sa pagkatap sa mga kaso sa diarrhea, nga gituohang gikan sa hugaw nga suplay sa tubig, nga nakapatay na og upat ug nakapa-ospital na og dul-an sa 200. Apan angay sang mopatin-aw ang DOH nganong napakyas ang ilang sistema pag-monitor sa pagsaka sa bisan unsang sakit sa bisan asang tambalanan sa Central Visayas. Kon nagtrabaho pa, makontrolar unta dayon ang epidemiya sa pag-ulbo ini sa niagi pang buwan.

Usa sa labing masulub-ong talan-awon nga nabantang ning krisis sa Loon, gawas sa pagpanagana sa mga biktima pagpatambal sa lungsod kay wa silay kuwartang ikabayad ug mga katreng kahigdaan, mao ang busluton ug gianay nang mga lingkoranan sa classrooms sa nangasakit nga mga tinun-an.

* * *

Di mabasol ang Malakanyang sa pagbandilyo sa wa pa, atol ug human sa tawag ni US Pres. George Bush kang Pres. Arroyo aron pagtino nga mahibaw-an sa tanang suok sa nasud ug sa kalibotan ang mahinungdanong tawag. Makahuloganon tinuod ang tawag sa pangu sa labing gamhanang nasud sa tibuok kalibotan nga nagpahalipay sa kamatayon sa duha ka labing dagkong mga pangu sa mga bandidong Abu Sayyaf.

Apan angayng pahinumdoman ang palasyo nga kon mosikit pag-ayo peligrong matakdan si Arroyo ni Bush. Ang gikuwestiyong kalibotanong gubat ni Bush batok sa terorismo nakapatibugsok sa pagsalig sa mga Amerikanhon sa iyang katakos di lang sa pagdaog sa gubat sa Iraq kon dili sa pagduma sa nasud. Ug si Bush bag-o lang nahiagom sa makauuwawng kapildehan sa midterm election-napildeng iyang mayoriya sa Senado, House ug mga gobernador, apil nang iyang manghod nga si Jeb. Ang labing gikahadlokang urom ni Arroyo mao nga kon mahisama siyang Bush sa eleksiyon karong Mayo, garantisadong mapalayas siya karong Hulyo.

* * *

Ang 605 ka bags sa dugo nga nahipos sa Kapamilya Bloodletting sa DYAB Abante Bisaya sa tibuok adlaw niadtong Sabado maoy labing daghan sukad masukad dinhi sa Sugbo. Makalipay nga hunahunaon nga inanay nang nabuntog sa mga Sugbuanon ang naandan natong kahadlok sa pagpatusok og dagkong dagom ug pagpaagas og dugo. Nagkadaghan nang nakasabot nga way sukaranan ang mga kahadlok nga ang paghatag og dugo makaluya, makapasakit o makamatay. Ang among tumong mao nga mas daghan pang makumbinser nga ang dugo tinuod gyod nga gasa sa kinabuhi.

Ang sunod nga Kapamilya Bloodletting gitakda karong Abril kay luwas man ang pagpakuha og dugo matag tulo ka buwan. Hinaot nga malabwan na sab gidaghanon sa dugo nga nahipos karong buwana. Ang among damgo nga wa nay pasyente nga mamatay tungod sa ka-wa o kalangay sa pagkuha sa abunong dugo. Sa tanang nakahatag og dugo, tinuod kamong bayani, kamo ang tinuod nga manluluwas sa kinabuhi.

* * *

Email: [email protected]