Langaw ug kabaw

Ang regional wage boards morang mga langaw nga nakatungtong sa kabaw nga, nahubog ba kaha sa kahabog na sa ilang nahimutangan, mao nay magbuot unsay angayng buhaton sa higanteng mananap. Ang mga sakop sa wage boards nga naglisod na pagtago sa namurot nilang mga ulo morang mga piniyalan sa asyenda nga di na ganahang mouli sa pagduma ngadto sa tinuod nga tag-iya sa kabtangan.

Ang gahom pagtakda sa suholan iya sa Kongreso. Nga gitugyan lang ngadto sa wage boards pinaagi sa Republic Act 6727 tungod sa panginahanglan nga ang mga senador ug mga kongresista motutok sa pag-umol og mas mahinungdanong mga balaodnon ug ang wage boards maoy mas suhito sa kahimtang sa ilang tagsa-tagsa ka rehiyon. Nahibawo na hinuon ta nga dobleng trahedya ang nahitabo: Ang Kongreso wa kapasar og mas mahinungdanong mga balaodnon ug ang wage boards niluok inay mopalambo sa kahimtang sa kabos nga mga anak sa singot.

* * *

Maong mahimo bang, sa di pa mag-piyesta ang mga anak sa singot sa gipasalig nga P125 nga across-the-board nga uminto sa suholan, atong klaruhon ang mosunod nga mga kamatuoran:

Ang mga kongresista nipasar sa balaodnon di tungod kay nagdugo ang ilang mga kasingkasing alang sa mga mamumuo kon dili tungod sa nag-alintabo nilang tinguha pagpapas sa Senado; ug

Ang mga senador mopasar sa ilang bersiyon sa balaodnon di tungod sa ilang gugma sa labor kon dili tungod kay di sila gustong maapiki sa minaru sa mga kongresista ug nga sila na hinuoy mahiagom sa kasuko sa mga anak sa singot nga mahitabong moapil na hinuon pag-awhag pagpapas sa Senado.

Ang mas pait nga kamatuoran mao nga mahimong, sama sa naandan, pagarpar ra gihapon kutob ug maglaway lang gihapon ang kinabag-an ning dakong uminto sa suholan.

* * *

Bisan kon mahapsay pa sa House of Representatives ug sa Senado pinaagi sa bicameral conference committee ang gagmayng kalainan sa ilang mga balaodnon, dunay duha ka babag sa pagkaumol sa balaod:

Una, ang mayoriya sa mga kongresista mahimong mopakita sa tinuod nilang bulok ug mobasura sa balaodnon nga napasar sa pipila lang ka kongresista, kasagaran nila gikan sa party list groups, nga nakahunat lang sa ilang salida kay way bisan usang nikuwestiyon sa kakuwang og quorum; ug

Ikaduha, bisan kon kadasonan pa sa duha ka bay balaoranan, nag-atang nang daan si Pres. Arroyo, nga makapatuyang sa iyang gibati kay di man siya kandidato sa eleksiyon sa Mayo karong tuiga, nga nagbitbit og atsa nga gimarkahan og "veto," ug di mahitabong supakon sa kinabag-an sa mga kongresista ang baruganan sa nagda sa puntil sa ilang mga kampanya.

Sa kauwahian, magkasabot ra gihapong langaw ug kabaw. Ug mga anak sa singot ra gihapoy tabangan nilag giok ug yatak-yatak.

* * *

Email: [email protected]