Mga kutongero gireklamo

Gikan sa cellphone number 0910-3651858: "Kana diha dapit sa Metro Colon paingon sa Gaisano South nga Colon St. grabe kaayo nang mga kutongero diha. Mga adik og dagway. Hulgaon dayon ang konduktor nga dili mohatag og kuwarta. Concern lang ko." -- (December 21, 2006--10:39:54)

Kining lugar nga gitumbok sa atong texter mao pod kini ang dapit nga anaay daghang traffic enforcer ug ubang tigpatuman sa balaod. Siyaro na man sab kon wala sila makakita nianang mga kutongero nga giingon sa atong texter? Labing maayo nga mabadlong kanang maong mga kutongero kay nakahatag kana silag kahasol sa mga driver ug konduktor sa PUJ nga moagi nianang maong dapit.

Nakamatikod bitaw sab ko nga daghan kaayong mangdelihinsiya diha. Ang uban morag konduktor nga manawag og pasahero. Pero sa dayon nang larga sa PUJ, mangayo og kuwarta sa driver. Dispatser diay. Ang uban anha sa konduktor mangayo og kuwarta. Masuko kun dili hatagan. Maayo ba gud kana? Angay gyud sikopon kanang mga tawhana!

* * *

Sa laing bahin: "Good day. Usa ko sa kanunay mobasa sa imong column. Regarding sa pangilad, nakadawat kog text nga nagpahibalo nga nakadaog kuno ko og dakong kantidad. Wala gyud nako gi-delete ang iyang cell. no. 0910-4032285. Matud sa iyang text, ang akong cellphone number kuno nakadaog sa Phil. Charity Foundation og P500,000. Ipa-text kuno ang akong name, age and address patawagon ni SAR (inisyal). Salamat Sir, sa pagtagad." 0918-2591014 (Dec. 24, 2006 --12:01:18)

Kanang imong nadawat usa gihapon ka matang sa text scam. Kon tinuod kang nakadaog, ang pahibalo dili ipaagi sa text gikan sa usa ka partikular nga cellphone number. Ipaagi gayod kini sa usa ka designated 3-digit o 4-digit numbers. Gawas pa, padad-an usab ikaw og pormal nga notisya pinaagi sa registered mail gikan sa nagpasiugda sa promo nga imong nadag-an.

Busa, ayaw gyud ninyo tuohi ang mga text nga inyong madawat nga nagpatuo nga nakadaog mo apan ang pahibalo gipaagi lang sa usa ka cellphone number.

* * *

(Sumbong ug reklamo? Text sa 0910-8105522)