EDITORYAL - Mga ganansya gikan sa Summit

Naay mga nangutana kun unsa may naganansya sa Sugbu sa pag-host niini sa Asean Summit ug East Asia Summit.

Naay ganansya nga di makita ug naa say atong makita. Ang dili makita di na lang una nato hisgutan kay komplikado kana ug nagkinahanglan og taas nga espasyo.

Hisgutan ta lang ang mga ganansiya nga atong makita sama sa hamis nga mga karsada ilabi na didto sa ilang ginganlan og ceremonial route ug mga kasikbit niining kadalanan.

Bisan ang dan Colon nga layo ra sa ceremonial route gipahamis sad og baga kaayo nga aspalto.

Of course, naa usab ang Cebu International Convention Center (CICC) nga giila karon nga maoy labing maanindot nga convention center sa Pilipinas. Di na lang nato hisgutan kun pila ang nagasto sa pagtukod sa maong edipisyo. Ang estraktura lang nga natukod alang sa Asean Summit.

Nalimpyo usab ang pipila ka mga dapit diin kaniadto hugaw kaayo ug nanimaho pa gani. Ganansiya ta sab ni--basta magpabilin lang nga limpyo bisan wa nay Summit.

Ang mga karaang edipisyo nga gilumotan na sa dugay'ng panahon gipamintalan sa mga tag-iya niini.

Hinaut unta nga kining mga visible gains nga atong naangkon gumikan sa atong pag-host sa Asean Summit magpadayon nga ganansya.