Internet voting

Malipayong gipahibalo sa Commission on Election ang bag-o nilang programa, ang internet voting nga masuwayan niining umaabot nga bugnong lugaynon. Ubos niining maong programa, ang atong mga kapuso nga atoa sa gawas sa nasud puwede na nga makahimo sa pagbotar pinaagi sa internet. Ang tuyo sa maong programa mao nga dili na mahago pag maayo ang mga botante sa pag-adto sa embahada sa Pilipinas sa nasud nga atua sila magtrabaho aron sa pagbotar, kana tungod kay puwede na man silang makaboto bisan sa ilang mga panimalay kun ugaling aduna lamang silay computer nga may internet connection. Matud pa sa Commission on election nga mga batid gikan sa Spanya ang motudlo niining maong programa. Ang programa pagasuwayan karong umaabot nga piniliay didto sa nasud sa Singapore diin matud pa adunay 26,000 ka mga botante.

Ang internet voting usa ka maayo nga programa nga gipasiugdahan sa commission on election kana gumikan kay sa ato nang gikaingon sa unahan sayon na lamang sa mga botante ang ilang pagbotar. Ang ako lamang nga gikabalak-an niining maong programa mao ang kaseguroan sa ato nga boto gikan sa mga gitawag og vices. Luwas kaha sa flying voters ang internet voting? Mapanalipdan kaha ubos niining maong programa ang kasagrado sa atong mga boto? Wala kaha idesinyo kining maong programa alang sa pagpabor sa ubang kandidato? Ang tubag ning maong mga pangutana ato lamang atangan pagkahuman na sa piniliay.

* * *

Nadakpan sa mga sakop sa Criminal Investigatioon and Detection Group - 7 didto sa may Cosmopolitan, Lahug si Bernard Liu. Si Bernard Liu kauban ni anhing Ananias Dy, mga empleyado sa managsoong Peter ug Willington Lim nga misaksi batok sa duha ka Lim atol sa gipahigayong Congressional investigation dinhi sa Sugbo tungod sa pagkalambigit niini sa pagpayuhot og mga ginadiling drugas sama sa shabu. Si Liu mipasangil sa duha ka Lim nga mipayuhot kini og shabu gikan sa Hong Kong paingon dinhi sa Sugbu ug gani matud pa niya kuyog sila sa paghimo niini. Tungod sa pamahayag ni Liu gipasakaan siya og kasong kalapasan sa Article 3, Section 2 sa Akta Republika 6425 kon importation of illegal drugs, hinungdan nga siya gidakop sa mga sakop sa CIDG-7. Pangutana! Nganong si Liu man lamang ang gidakop ug gipasakaan og kasong importasyon og illegal nga drugas? Nganong wa man apila sa pagpadakop ang duha ka managsoong Lim? Dili ba sila mang ubana sa pagpayuhot sa ginadiling drugas sigon sa pasangil? Tinood kaha nga adunay mga tag-as nga opisyal sa gobyerno ang nagtapion sa mga Lim? Ug nga kining maong mga opisyal mas influenciado pa kay kang Congressman Tony Cuenco? Just asking!