Mangunguot sa Pier 4

Usa sa angay gayud bantayan sa atong kaigsuonan mao kining mga mangunguot. Kining maong mga badlongon sa katilingban mag-operate bisan asa. Sagad kini silang mangbiktima sa busy nga mga lugar sa siyudad ingon pananglit sa mga pantalan, mga aseras, sa plasa ug sa ubang dapit nga dansohanan sa daghang mga tawo.

Dugtong niini, usa ka magbabasa ning lindog mi-text nga nagkanayon: "Good day. Ang akong reklamo mahitungod sa mga mangunguot sa Pier 4. Ako nakasuway na niini samtang nag-work pa ko sa Metro. Dagko og lawas nang mga tawhana. Pormal kaayog barog og pamiste. Naay taason unya naa poy bungi." -- 0915-8801401 (December 11, 2006 -- 10:13L03)

Daghang salamat sa kasayoran nga imong gipadangat, higala. Nakaseguro ko nga makatabang gayod kini sa atong kaigsuonan nga mag-anhaan diha sa may Pier 4. Daghan ra ba gyong mga tawo nga motaak sa maong dapit matag adlaw, pasahero man o dili. Mao nga angay gayod silang magbantay niining mga mangunguot nga imong gipanghisgotan. Tinuod nga busy kanang dapita sa Pier 4 mao nga makapasalir gayod ang mga mangunguot sa ilang tinonto diha. Angay sab ning monitoron sa mga awtoridad.

* * *

Sa laing bahin: "Good day. Ngano man nang mga department store nga estrikto man? Namalit ko unya nahibilin ang akong payong tungod sa kadaghan sa akong pinalit. Wala na nako nakuha sa courtesy counter pero diha pa nako ang claim number. Pagkaugma gikuha nako pero may bayad na nga P40. Okey lang unta kun P20 lang. P65 lang bili ko sa payong ko tapos mag-charge pa ako ng P40 para ma-claim sa courtesy counter. Payong ko 'yun, hindi naman puwede pumasok na may dalang payong. Gano'n ba talaga 'yun?" -- 0920-65318366 (December 10, 2006 -- 21:04:13)

Kun mosulod kita sa ingon nianang mga establisamento, obligado gayod kitang mopailawom sa ilang mga patakaran, partikular na sa pagbilin nato og butang diha sa courtesy counter. Basaha sa claim card nga imong mahuptan, naa diha ang mga kondisyon ug konsiderasyon kalabot sa imong pagbilin og butang sa courtesy counter. Usa na niana ang pag-charge kun dili nimo makuha ang butang nga imong gibilin sa courtesy counter saylo sa usa ka adlaw. Wala kitay mahimo niana.

(Sumbong ug reklamo? Text sa 0910-8105522)