Damgo sa amahan

Ang Dios Miingon
Pamalandong Matag Domingo
Enero 7, 2007: Solemnidad sa Epipaniya sa Ginoo
Mga Pagbasa: Is. 60:1-6/Ef. 3:2-3,5-6/Mt. 2:1-12

Damgo sa Amahan, mao kanunay ang madunggan sa mga higayon nga ihatag na ang mga BEC Modules sa bisan asang parokyaha. Mga damgo nga usahay dili matinuod tungod sa kinaiyang iya-iya, ato-ato lang. Kay karong panahona man gud mas kusog ang ego-centricism inay ang altruism. Ang exclusivism inay ang inclusivism.

Epipaniya karon sa Ginoo. Kasaulogan nga nagmatuod nga ang Dios dili lang alang sa mga pipila ka pudyot sa tawhanong kaliwatan kondili alang siya sa tanang katawhan ning kalibutan. Nga sa ato pa, siya Dios natong tanan.

Unsay mensahe niini sa atong inadlaw'ng pagkinabuhi? Kini nagpasabut nga dili tukma ang pag-angkon sa Ginoo o dili ba ang pag-angkon nga kita lamang ang maluwas o ang nagbuhat sa kabubut-on sa Dios. Maingon usab nga ang matag tawo ang dili makabuot kun unsang matanga sa pagkinabuhi ang bitbiton og puy-an sa usa ka tawo. Managlahi ang atong panlasa og dili mahitabo nga ang imong pamaagi akong himoong pamaagi. Not unless kon kini mohaom kanako dili ba? Dugang pa, ang creativity sa Diosnong Grasya ang makalihok segun sa panahon og panginahanglan. Mao nga lisud kaayong dal-on ang kagahapon aron isul-ob sa karon. Kay matag gutlo og panahon adunay kaugalingong liyok og tawag...

Epipaniya karon sa Ginoo. Kini ang panahon nga diha sa pagtabang sa uban, dili lang nato kini himoong sabton nga kutob lang sa Tulo ka Hari kondili tungod sa maong tabunok nga simbolismo makatugkad kita sa dakong bili sa pakiglambigit. Maingon nga ang atong Ginoo nakiglambigit kanatong tanan, puti ka man o itom. Adunahan ka man o kabos.

* * *

E-mail: [email protected]