Tungod sa kasiot ug ka-sekreto sa maong butanganan, gilayon nasentro ang pagduda ngadto sa mga taga-diha ra usab nagtrabaho sa maong edipisyo. Gilayon gi-kordon ang maong lugar ug gilihok sa NBI ang hilom-hilom nga pag-imbestigar.
Nianang pagka-Martes, ang tanang empleyado sa maong opisina, ma-babaye, ma-lalaki, ma-clerk o piskal man, gikuhaan sa ilang mga fingerprints. Naapil usab kadtong empleyado sa janitorial services nga maoy gi-kontrata sa Kapitolyo alang sa pag-mentinar sa kalimpyo.
Sa tabang sa mga gwardiya sa Blue Dozen Security Agency pinangulohan sa ilang Chief Security nga si Romeo Jamaybay, nakahimo dayon ug paki-susi ang taga NBI sa palibot sa Palace of Justice ug tuod man, nakit-an ug nakuha gayud ang mga kinawat nga ebidensya.
Ang usa ka empleyado sa Building Maintenance nagpanuko sa pag-atubang dihang gipatawag sa NBI, busa mipadayon na lang ang NBI sa pakisusi bisan sa kakulang sa kooperasyon sa ubang mga empleyado sa Kapitolyo. Nahibaw-an sa pakisusi pagka-sunod adlaw nga ang maong empleyado suod diay sa suspetsado.
Sa interview sa TV, miingon ang taga-NBI nga dili pa gayud nila mahimong sirad-an ang maong kaso. Daghan pa silang teyoriya nga gisubay.
Bisan sa kagamay sa ilang mga operatiba, ang NBI nagpabilin nga giila sa ilang kapaspas nga motrabaho. Dali silang mo-aksyon sa mga reklamo ug ang ilang mga pamaagi sa pag-imbestigar pinasubay sa mga bag-ong teknolohiya ug propesyonal kaayo.
Pinaagi ning maong lindog, buot nga ipaabot sa taga-Provincial Prosecutor's Office ang ilang mainitong pasalamat ngadto kang Acting Regional Director Medardo de Lemos, Atty. Renan Oliva, Ms. Jed Hife, Mr. Dennis Chiong ug uban pang mga kaubanan.
Mapasalamaton usab kami sa gipakitang pagbulig sa mga security guards sa Palace of Justice, ilabi na kang Chief Security Office Romeo Jamaybay ug Security Guard Ronald H. Jaime. Alang niadtong mga tawong mga kulang sa pansin ug mosakay na lang sa maong isyu, ang akong ikasulti mao kini: Mas maayo pa nga inyong trabahoon ang inyong mga trabaho nga inyo lang gipasagdan bisag nagdawat kamog sweldo, kay kami sa among opisina wala mo-bilib sa inyong patoo-too, ug kun aduna man kami konsultahon bahin sa security, kadto lamang mga eksperto ang among usikan sa among oras sa pagpangayo sa ilang hunahuna. Kini bitaw'ng mga tawo mga modayon ug ukab sa baba bisan walay kasayuran sa katinuoran, dali kaayong mamu-mu ug sa kapulihay, mamahimo hinoon nga kataw-anan ug kengkoy sa mata sa katawhan.