Di sad diay sila mo-Mea Culpa?

Bahala nag unsay sulti sa uban, basta kay alang nako, dalaygon kaayo ang gihimo nga pag-MEA CULPA ni Congressman Tony Cuenco. Tagsa da sa atong mga lider karong panahona, ang muangkon og sayop ug mangayo pa gyug pasaylo.

Alang nako, di kinahanglan nga mangayog pasaylo, sama sa uban natong mga Kongresista dinhi sa Sugbo, yet, aron pagpakita nga dili for show ang iyang pag-angkon sa sayop (ang uban ra ba, miinsistir gihapon nga husto sila), nangayo gyud siyag pasaylo.

Alang nako, bisag wa sila mangutana, husto kaayo ang gibuhat ni Tony Cuenco. Pasagdi lang nang uban, Ton kay lagmit mauwaw silang mangayog pasaylo. Gawas pa, naunhan sila nimo, ug di sila gustong ingnon nga nisunod lang sila nimo.

Dili sayon ang pag-angkon sa sala, ug mas dili sayon ang pagpangayog pasaylo. Maoy hinungdan nga atong gidayeg si Tony sa iyang gibuhat.

Taphaw kaayo ang katin-awan nga gihatag ni Congressman Raul del Mar, ngano nga miuyon siya sa Con-Ass. Nag-preside-preside pa siya, hawod kaayo kay nagsalig sa tyranny of numbers, ug gi-overlook ang sentimento sa katawhan.

Samtang di sayon ang pag-angkon sa sala ug pagpangayog pasaylo, di man ni imposibling buhaton.

Klaro kaayo nga sayop sila, gikan pa sa ilang gipaluyohan nga People's Initiative. Apan tungod lagi kay mayoriya sila, tungod sa numbers, ila gyung gipugos ang ilang gusto. Tiaw moy di na unta ta mag-eleksiyon, wagtangon Senado ug ang prinsipyo sa checks and balance, sila na lay magbuot, i-extend ang ilang mga terms diin sila ray magbuot hangtud kanus-a, ug sila rayt magbuot kon unsay ilang usbon sa Konstitusyon.

Di ba ni klaro kaayo nga unconstitutional ug immoral? Nganong mipaluyo man sila niini? Daku kining abuso, ug dakung pagluib sa pagsalig kanila sa lungsod. Mao nga sa ka daku sa kasal-anan nga ilang nahimo, angayan gyung mangayog pasaylo.

Ug atong gikasubo nga si Tony Cuenco ray nakaamgo niini. Si Tony Cuenco ray nakabatong og tumang kaisog pagbuhat sa ingon. Si Tony Cuenco ray wa mahadlok nga kasab-an ni Speaker de Venecia ug ni Gloria.

Gumikan niini, Ton, naa ko nimo. Di kinahanglan nga ilakip ko nimo sa imong payroll. Akong usbon, among pahalipay sa maisugon nimong gibuhat. .