Nakadaog og computer kuno

Kining maong modus operandi anaa mokaylap sa internet. Maoy sagad nga mabiktima niini kadtong mga indibidwal nga nagbaton og e-mail account. Mao nga angay magbantay niini kadtong mahiligon sa pag-internet.

Ang estilo mao nga makadawat kag e-mail nga nagpahibalo kanimo nga nakadaog ka og computer unit nga brand new nga laptop. Patuohon ka nga ang nagpadala kanimo sa maong pahibalo mao ang executive vice president sa usa sa labing dakong dealer ug tigbuhat og computer sa kalibotan.

Sa iyang e-mail, patuohon ka nga ang imong e-mail gi-attach ngadto sa usa ka ticket nga nagdala sa 5-digit number. Gitawag kuno kini og electronic random raffle ug ang imong e-mail maoy nakadaog sa usa ka unit nga laptop computer.

Aron (kuno) makuha nimo ang imong premyo, padepositohon ka og kuwarta sa usa ka partikular nga bank account. Ang kuwarta nga imong ideposito mao kuno'y gastohon sa door-to-door delivery sa computer nga imong nadaog. Ayaw gyud kamo pagtuo niini kay usa kini ka dakong pangilad.

* * *

Sa laing bahin: "Good day. Naay mga polis diri sa Carmen nga imbes manakop sa manindahay og masiao, motabon pa hinuon. Mao hinuoy dakpon ang mag-drive og habal-habal nga unta hinagoan ang panginabuhi. Mag-una pa ang ilang labaw og pamara sa mga motor aron manakop. Naa hinuoy masiao wala gyod dakpa." -- 0916-3581837 (November 25, 2006 -- 14:27:01)

Dili lang una nato kondenahon ang kapolisan sa Carmen kalabot niining maong sumbong. Ang akong ikasulti mao nga angay kining susihon ug subayon aron masuta kun tinuod ba nga naglihok ang operasyon sa masiao diha sa maong dapit. Ug kun mamatud-an nga tinuod, kinahanglang dakpon gyud kini. Dili kini angay pasagdan aron dili magduda ang mga lungsoranong magbubuhis sa kaligdong sa kapolisan sa ilang pagtuman sa ilang katungdanan.

* * *

(Sumbong ug reklamo? Text sa 0910-8105522)