EDITORYAL — Yangungo sa mga drayber

Usa ka grupo sa mga drayber sa PUJ ang nangayog subsidy kun hinabang sa kagamhanan atol sa upat ka adlaw nga pagpahigayon dinhi sa 12th ASEAN Summit.

Matud sa tigpamaba sa maong pundok mawad-an og panginabuhian ang mga drayber sud sa upat ka adlaw mga summit kay gidid-an man sila sa pagbiyahe sa mga dan nga nasud sa gitawag nga ceremonial routes.

Malipay kuno ang mga drayber kun kahatagan sila og bugas nga ilang malung-ag sud sa upat ka adlaw.

May basihanan ang yangungo sa mga drayber. Makatarunganon nga kahatagan kini og seryosong konsiderasyon sa kagamhanan. Kon anaay laing matang sa tabang nga mahatag ang gobyerno ngadtos mga drayber maayong himuon kini.

Liboan ka mga PUJ drayber ang maapektahan sa ASEAN Summit ug kinahanglan lang nga hatagan kinig pagtagad samtang atong gihatagan og labaw pang pagtagad sa seguridad sa mga lider sa ASEAN nga manganhi dinhi.