Pangilkil sa PDEA7

Si Castro Sabal, dinakpan sa Philippine Drug Enforcement Agency kun PDEA 7 mipasangil ngadto nila ni Police Superintendent Amado Marquez, director sa nahisgutang buhatan, Inspector Arceliano Beñares, SPO1 Cecilio Gomez, PO2 Rey Robert Villaret ug PO3 Jose Erwin Dumagit nga nangilkil ngadto kaniya og usa ka milyon.

Si Castro Sabal, Tata Acang, ug Taner Macalnas nadakpan kini sa mga elemento sa PDEA niadtong Enero 30 ning tuiga didto sa may parking area sa SM City atol sa giingong usa ka buy bust operation.

Human gidakop, gidala dayon sila sa buhatan sa PDEA 7 ug didto gipangayoan siya og usa ka kilong shabu. Dugang pa ni Sabal nga kun ugaling dili siya makahatag sa usa ka kilong shabu, usa na lamang ka milyon nga kwarta.

Matud pa sa reklamo nga bisan og inosente sila sa kaso, ang iyang asawa nakahatag gayud og 230mil ka pesos nga gidepositro niini sa bangko.

Nonot niini, si Castro Sabal ug mga kaubanan mipasaka og kasong incriminating against innocent person ug planting of evidence didto sa buhatan sa ombudsman. Gani kining maong kaso mao ang ilang gibasihan sa ilang pagdepensa sa kaso nga ilang giatubang diha sa sala ni judge Fortunato de Gracia.

Kining maong pasangil siryoso busa angayan nga tan-awon pagmaayo sa hukmanan nga naghupot sa kaso niining maong mga akusado. Kinahanglan nga sutaon kun ang pasangil tinuod ba o ba kaha tumo-tumo lamang aron dauton lang ang dagway sa PDEA.

* * *

Ugmang adlawa ipahigayon na ang dry run sa kadalanan nga diin anha mangagi ang mga delegado sa Asean summit. Manghinaot lang ta nga dili tawon mangatanggong ang mga residente diri sa taas nga bahin Marco Polo Hotel.

* * *

Mga sakop sa kahugpungan sa gagmay'ng mananagat ang nanglangoy sa dagat paingon sa luyo nga bahin sa Malakanyang of the South agi og pagprotesta sa pagsalmot sa Amerika sa Asean summit. Pangutana: sa kadaghang kanasuran nga mosalmot sa summit nganong ang Amerika man lang ang protestahan, unsa may naa sa Amerika nga wala sa ubang kanasuran sama sa China, Japan, Europa ug kanasurang sakop sa ASEAN?