Akong pagka-Katoliko wala mag-agad sa pari

Magpabilin akong Katoliko, bisan pag makasala na ang tanang pari sa tibuok kalibutan. Kini tungod kay ang akong pagtoo wala mag-agad sa kabuotan o kabuang sa mga pari.

Sa ato pa, inigka-sala sa pari, iya na na between himself and God. Kun siya ma-impiyerno, gumikan sa iyang mga sala, di ko mokuyog niya. Magpabilin ako sa akong Faith. Di ko mobalhin og laing relihiyon.

Mosimba gihapon ko, ug motuman sa tanang bulohaton sa usa ka Catoliko. Gani, mahimo nga mokompisal gihapon ko niya, ug maminaw sa iyang mga sermon. Ug ako pa siyang iampo aron mabut-an, tungod kay di lalim ang pagka-pari.

Ikaw bay pari, lalim ba!

Sa iyang ordinasyon pagka-pari, wala siya kuhai sa Ginoo sa iyang pagka-makasasala. In fact, mahimo nga siya mas maka-sasala kay sa dili mga pari. Sa iyang paghukom nga mosulod sa seminaryo, wala kadto magpasabot nga di na siya maibog og babaye. Wala kadto mohikaw kaniya sa mga kinaiya sa average human being.

Gani, sa iya nang pagka-pari, wala siya mahimong super-buotan nga di na gyud madutlan og sala. Kon buot hunahunaon, gumikan sa iyang pagka-pari, mas grabe ang mga tentasyon. Siya kanunay ang target sa mga panuway, sama niadtong mga paningkamot ni Satanas pagtintal ni Cristo mismo.

Ikaw, Dro, di ka kinahanglan tintalon tungod kay daan na kang alalay ug amigo ni Satanas. Mahimo gani nga gamiton ka paghimog dugang panghimaraut sa pari. Kinahanglan imong inudnod pag-ayo ngadto sa lapok ang pari nga makasala. Lipay kaayo ang yawa niini.

Ikaw bay pari, lalim ba!

Akong usbon, despite sa mga kasal-anan sa pari, dili kini makatandog sa akong Faith. Nganong ako mang iamong ang akong salvation sa sala sa pari? Ngano man nga inigka-sala sa pari, ubanan ko siya sa iyang pagka-makasasala pinaagi sa dili na pagtuman sa mga kaakohan sa akong pagtoo?

Inigka-sala sa pari, alang nako, wala kini magpasabot nga dautan ang Catholic Faith ug angayan biyaan ug isalikway. Far from it. Ug Dro, imagina kono kon walay pari! Ug kon isalikway mo ang imong Faith, gumikan sa sala sa pari, makaseguro ka 100 percent nga husto ka sa imong gibuhat?