Nagbago ang Pasko?

Sasapit na naman Pasko’t Bagong Taon

pero bakit kaya iba ang panahon?

Pagdiriwang ngayo’y hindi tulad noong

ang buong paligid masaya’t maugong!

Bakit nga, bakit nga parang nagbago na

ang diwa ng Pasko’y tila nawawala?

Ngayo’y walang parol sa mga bintana

awiting pamasko’y naglaho rin yata!

Nobyembre na ngayon pero ang daigdig

ay parang tameme sa Paskong marikit;

Ang sigla ng tao ay parang dinagit

ng mga sakunang sa ati’y sumapit!

Ang bagyong Milenyo’y nag-iwan ng sugat

na lubhang malalim sa puso at balat;

Lindol at tsunami ay nakagugulat

may sunog at bulkang biglang sumambulat !

Ah siguro’y ito ang mga dahilan

kung bakit ang Pasko’y waring di daraan;

At ang Bagong Taon na nakasanayan

parang kahi’t pa’no’y daraan na lamang!

Dati kung ganitong panaho’y malamig

sa putok ng kanyon nagiging mainit;

Batang naglalaro sa bayan at bukid

sa takot sa bomba’y agad lumiligpit!

Binata’t dalaga na nagmamahalan

sa mga kalsada’y hindi na mamasdan;

Natatakot silang sa kalye’y tamaan

ng sabog ng bombang tanim ng kalaban!

Pasko’t Bagong Taon ay ating sikapin

ipagdiwang itong bukal sa damdamin;

Ang datihang saya’y huwag nang hanapin

masiyahan na lang sa buhay na angkin!

Kaya masasabing talagang nagbago

ang ating panahon at saka ang Pasko;

Marahil babalik ang Paskong magarbo

kapag nagbago na ugali ng tao!